მრავალწლიანი აკრძალვის შემდეგ, საუდის არაბეთში ქალებმა მანქანის მართვის უფლება მიიღეს. ისტორიული ცვლილება გასული წლის სექტემბერში დაანონსდა, ხოლო ივნისის დასაწყისში ქვეყანაში ქალზე პირველი მართვის მოწმობა გაიცა.

საუდის არაბეთი უკანასკნელი ქვეყანა იყო, რომელიც ქალებს მანქანის მართვის უფლებას არ აძლევდა და ოჯახები იძულებულები იყვნენ ქალი ნათესავებისთვის მძღოლები დაექირავებინათ.

90-იანი წლებიდან, ქვეყანაში უამრავი ქალი დააპატიმრეს, მანქანის მართვის გამო. უფლებადამცველები ქალებისთვის მანქანის მართვის უფლების მიცემისთვის 2008 წლიდან იბრძვიან.

"ეს საუდის არაბეთში მცხოვრები ქალებისთვის ისტორიული წუთებია", - ამბობს საბიკა ალ-დოზარი, საუდის არაბეთში ერთ-ერთი ცნობილი ქალია, რომელიც ამ უფლებისთვის წლებია იბრძვის.

23 ივნისს, საუდის არაბეთის დროით საღამოს ცხრა საათზე, აკრძალვა მთელ ქვეყანაში ოფიციალურად მოიხსნა და ამ ისტორიულ წუთებში უამრავი ქალი უკვე მანქანის საჭესთან იჯდა.

"უმნიშვნელოვანესია, რომ საკუთარი საქმის გასაკეთებლად ვინმესთვის გადაადგილების თხოვნა არ მიწევდეს. მე ჩემს საქმეებს თავად ვაგვარებ და მანქანით ტარებისთვის ვინმეს გამოყენება არ მჭირდება", - ამბობს BBC-ის რეპორტაჟის ერთ-ერთი გმირი.