როცა ნარკოტიკების მიერ მოტანილ ზიანზე ვსაუბრობთ, თითქმის ყოველთვის ადამიანს ვგულისხმობთ, მაგრამ ახალი კვლევის თანახმად, ნარკოტიკებს სხვა ცოცხალი არსებებისთვისაც მოაქვს ზიანი.

გადაშენების პირას მყოფმა გველთევზებმა შეიძლება გასამრავლებლად 6000-მდე კილომეტრის გადაცურვა ვერ შეძლონ და ამის მიზეზი კოკაინით დაბინძურებული მდინარეებია.

როგორ ხვდება კოკაინი ან ამფეტამინი წყალში? რა თქმა უნდა, მისი მომხმარებლების გავლით, კერძოდ კი - შარდით.

ნარკოტიკებით მდინარეების დაბინძურება მეცნიერებისთვის სიახლე არაა, თუმცა ეკოსისტემაზე ამ გარემოების გავლენა აქამდე დადგენილი არ იყო.

თევზებზე ნარკოტიკების მოქმედების უკეთესად შესასწავლად, ნეაპოლის უნივერსიტეტის ბიოლოგებმა ევროპული გველთევზები კოკაინშერეულ წყალში 50 დღის განმავლობაში მოათავსეს.

საცდელი გველთევზები იმ თევზებთან შედარებით, რომლებიც ჩვეულებრივ წყალში იმყოფებოდნენ, ჰიპერაქტიულად იქცეოდნენ. ნარკოტიკი მათ ტვინში, კუნთებსა თუ კანში დაგროვდა, რამაც კუნთების დაშლა და შესიება გამოიწვია. ეფექტი ჩვეულებრივ წყალში გადაყვანიდან 10 დღის განმავლობაშიც არ გამქრალა.

მეცნიერების ვარაუდით, გველთევზები ამ მდგომარეობაში გამრავლებას ვეღარ შეძლებენ.

2015 წელს ნარკოტიკების მონიტორინგის ევროპულმა ცენტრმა განაცხადა, რომ ლონდონის კანალიზაცია ევროპაში ყველაზე მეტადაა გაჯერებული კოკაინით.