რუსთაველის წინ მიმდინარე აქციაზე დაკავებულების განცხადებით, პოლიციელებმა დაკავებისას საკუთარ უფლებამოსილებას გადაამეტეს.

ერთ-ერთი დაკავებულის გიორგი ხაბურძანიას თქმით, მიმართავენ მთავარ პროკურატურასა და შინაგან საქმეთა სამინისტროს გენერალურ ინსპექციას, რომ 11 ივნისს პოლიციელთა მხრიდან შესაძლო უფლებამოსილების გადამეტების ფაქტზე დროული მოკვლევა აწარმოონ.

"აღვნიშნავთ, რომ სასამართლო პროცესზე ვერც ერთმა საპატრულო პოლიციის დეპარტამენტის წარმომადგენელმა ვერ წარმოადგინა მტკიცებულება ჩვენი დანაშაულებრივი ქმედებების შესახებ, რაც მათ პროცესზეც აღნიშნეს, რომ არ დაუნახავთ ჩვენ მიერ ჩადენილი რაიმე დანაშაული. ეს დაკავებები იყო პოლიტიკური და ემსახურებოდა ერთადერთ მიზანს, დაეშალათ და დაესაჯათ ყველა იქ მყოფი", - განაცხადა გიორგი ხაბურძანიამ.

მისი თქმით, პოლიციამ იძალადა აქციის მონაწილეებზე, მათ შორის არასრულწლოვნებსა და ქალბატონებზე.

"მოვითხოვთ, დაუყოვნებლივ მოხდეს იმ მაღალჩინოსნების თანამშრომლების გამოვლენა და უმკაცრესად დასჯა, რომლებმაც უკანონოდ შეუზღუდეს თავისუფლება აქციის მონაწილეებს და იძალადეს მოქალაქეებზე", – განაცხადა გიორგი ხაბურძანიამ.

რუსთაველის გამზირზე 11 ივნისს რამდენიმე ინციდენტი მოხდა, რომლის დროსაც სულ 19 მოქალაქე დააკავეს.