პარლამენტის წევრის ზვიად ძიძიგურის აზრით, მაღალტექნოლოგიური ეპოქის პირობებშიც კი არა რის იოლი ფარული კადრების საქმეში დამნაშავეების გამოვლენა. მისი თქმით, ამას განვითარებული ქვეყნებიც კი ვერ ახერხებენ და საქართველოში გავრცელებული კადრების საქმე ტერორისტული დაჯგუფება ისლამური სახელმწიფოს მიერ გავრცელებულ მკვლელობის ამსახველ ვიდეოებს შეადარა:

"მე არ ვეთანხმები თინა ხიდაშელს, როდესაც თქვა, რომ მაღალტექნოლოგიური ეპოქის პირობებში ძალიან ადვილია ფარული კადრების საქმის გამოძიება, ვერ გეტყვით რომ ეს ასეა. ტერორისტები მოჭრიან თავს ხალხს, შემდეგ ინტერნეტში ამას დადებენ და ამერიკის ხელისუფლებას უგზავნიან შანტაჟის მიხედვით და ჩვენზე გაცილებით მაღალ ტექნოლოგიური ქვეყანა ვერ ახერხებს რომ გახსნას ეს მყისიერად".

აღნიშნულის შესახებ ძიძიგურმა რუსთავი 2-ზე არჩევანის ეთერში განაცხადა. ამავე გადაცემაში თავდაცვის მინისტრმა თინა ხიდაშელმა თქვა რომ თუკი ფარული კადრების გავრცელების საქმეზე დაკავებულ პირებს გაათავისუფლებენ და საპროცესო შეთანხმება გაფორმდება ასეთ შემთხვევაში იგი დაელოდება პასუხს მიზეზის შესახებ, რა გახდა ისეთი ცნობილი პროკურატურისთვის, რის გამოც გადაწყვიტა, რომ ეს ადამიანები გამოეშვა საპატიმროებიდან:

"სრული პასუხისმგებლობით ვაცხადებ, ეს არ არის რთულად გამოსაძიებელი დანაშაული, თუ არ არსებობს სუბიექტური მიზეზი, რომლის გამოც არ შეგწევს უნარი, დაასახელო ადამიანები, რომლებიც ამ ყველაფერის უკან დგანან".