ბრაზილიაში, რიო დე ჟანეიროს ოლიმპიურ თამაშებში 39 ქართველი სპორტსმენი 13 ოლიმპიურ სახეობაში მიიღებს მონაწილეობას. თბილისის ოლიმპიურ პარკში დღეს ოლიმპიური ფიცის დადებისა და საქართველოს დელეგაციის გაცილების ცერემონია გაიმართა, რომელზეც პრემიერმინისტრმა, გიორგი კვირიკაშვილმა სპორტსმენებს წარმატება უსურვა:

"ზაფხულის ოლიმპიურ თამაშებზე, 13 სახეობაში 39 ქართველი სპორტსმენი იასპარეზებს, რაც, დამოუკიდებელი საქართველოს ისტორიაში, უპრეცედენტო რაოდენობაა. დღეს მთელი საქართველო თქვენი გულშემატკივარია. ჩვენ ძალიან გვჭირდება გამარჯვებები და დარწმუნებული ვარ, ერთად ამ გამარჯვებებს მივაღწევთ".

კვირიკაშვილმა ბრაზილიასაც მიულოცა წარმატება, რომელიც მას მსოფლიო ოლიმპიური თამაშების მასპინძლობის სახით ხვდა წილად და აღნიშნა, რომ ეს ყველა ქვეყნისთვის უდიდესი პატივია, მით უმეტეს, ისეთი სპორტული ტრადიციებით გამორჩეული ქვეყნისთვის, როგორიც ბრაზილიაა.

თბილისის ოლიმპიურ პარკში ოლიმპიური ფიცის დადებისა და საქართველოს დელეგაციის გაცილების ცერემონია გაიმართა, 23 ივლისი, 2016.

ფოტო: საქართველოს მთავრობა

სპორტსმენების გაცილების ცერემონიაში მონაწილეობდნენ პრეზიდენტი, სპორტის მინისტრი, ეროვნული ოლიმპიური კომიტეტის პრეზიდენტი, თბილისის მერი, ბრაზილიის ელჩი და სპორტული საზოგადების წარმომადგენლები.