მედიის განვითარების ფონდი აცხადებს, რომ წინასაარჩევნოდ ტელევიზიებში განთავსებული ფინანსთა სამინისტროს ვიდეორგოლი, სავარაუდოდ არაკანონიერია და უწყებებს მის შესწავლას სთხოვს.

MDF მიიჩნევს, რომ 2016 წლის 16-17 ივლისს ტელეკომპანიების რუსთავი 2-ის, იმედისა და მაესტროს ეთერში განთავსებული ვიდეორგოლის საარჩევნო და მაუწყებლობის შესახებ კანონმდებლობასთან შეუსაბამოა და თავისუფალი და სამართლიანი არჩევნებისათვის უწყებათაშორის კომისიას, ცენტრალურ საარჩევნო კომისიასა და კომუნიკაციების მარეგულირებელ კომისიას მისი განხილვის თხოვნით მიმართავს.

სადავო ვიდეო რგოლს, რომელიც ტელევიზიებში ფინანსთა სამინისტროს მიერ განთავსდა, მინიჭებული აქვს სოციალური რეკლამის სტატუსი. მედიის განვითარების ფონდის აზრით, ვიდეორგოლი, რომელიც ქვეყნის სწრაფი განვითარებისაკენ მიმართული ეკონომიკური რეფორმის ოთხ პუნქტიან მთავრობის გეგმას შეეხება, პოლიტიკური რეკლამის ნიშნებს შეიცავს და მმართველი გუნდის სასარგებლოდ ადმინისტრაციული რესურსის გამოყენების ნიშნებს ატარებს.

"სახელდობრ, რგოლი შეიცავს საქართველოს მთავრობის მიერ უკვე განხორციელებული ეკონომიკური და საგადასახადო რეფორმების შესახებ დებულებებს, რაც მთავრობის ქმედებების პოპულარიზაციას ახდენს და რეალურად, პოლიტიკური რეკლამის სახეს ატარებს" - აცხადებენ ორგანიზაციაში.

MDF-ის მიხედვით, ვიდეო რგოლი ეწინააღმდეგება სოციალური რეკლამის დეფინიციას, რომელიც მაუწყებელთა კანონშია მოცემული.

აღნიშნული კანონის მიხედვით, სოციალური რეკლამა საზოგადოებრივი სიკეთის ხელშეწყობისკენ, საქველმოქმედო მიზნების მიღწევისკენ, მნიშვნელოვან საზოგადოებრივ საკითხებზე საზოგადოების ცნობიერების ამაღლებისკენ ან/და საზოგადოების ქცევის პოზიტიური თვალსაზრისით შეცვლის ხელშეწყობისკენაა მიმართული და არ არის არც კომერციული და არც წინასაარჩევნო რეკლამა და არ შეიცავს სახელმწიფო ან ადგილობრივი თვითმმართველობის ორგანოს, კერძო ან საჯარო სამართლის იურიდიული პირის მიერ გაწეული მომსახურების რეკლამას.

იმისათვის, რომ წინასაარჩევნო პერიოდში მოხდეს სახელმწიფო ინსტიტუტების მიერ გაწეული მომსახურების საარჩევნო აგიტაციისგან მკაფიოდ გამიჯვნა და გამოირიცხოს ადმინისტრაციული რესურსის პარტიული მიზნებისთვის გამოყენება, მედიის განვითარების ფონდის აზრით, მნიშვნელოვანია:

• უწყებათაშორისმა კომისიამ შეიმუშავოს რეკომენდაციები საქართველოს მთავრობისა და სხვა საჯარო უწყებებისადმი, რაც წინასაარჩევნო პერიოდში მედიაში ისეთი შინაარსის რეკლამის განთავსებას შეზღუდავს, რომელიც მოქალაქეებისათვის გარკვეული სერვისების მიწოდების ნაცვლად, ხელისუფლების საქმიანობის პოპულარიზაციას ახდენს და პოლიტიკური რეკლამის ნიშნებს ატარებს;
• ცენტრალურმა საარჩევნო კომისიამ შეისწავლოს, წარმოადგენს თუ არა აღნიშნული ვიდეორგოლის წინასაარჩევნოდ ეთერში განთავსება ადმინისტრაციული რესურსის გამოყენებას და მიიღოს შესაბამისი ზომები;
• კომუნიკაციების მარეგულირებელმა კომისიამ შეისწავლოს, რამდენად წარმოადგენს აღნიშნული ვიდეო სოციალურ რეკლამას.

ამასთანავე, ორგანიზაციის აზრით, მნიშვნელოვანია, რომ დაცული იყოს სამართლიანი და თავისუფალი არჩევნებისათვის უწყებათაშორისი კომისიის ის სტანდარტი, რომელიც ამ ინსტიტუტმა 2012 წლის საპარლამენტო და 2013 წლის პარლამენტის შუალედურ არჩევნებზე დაადგინა, როცა წინაასარჩევნო პერიოდში შეზღუდა ეთერში ისეთი ვიდეორგოლების განთავსება, რომლებიც მთავრობის მიერ გაწეული საქმიანობის პოპულარიზაციას ისახავდა მიზნად და საარჩევნო რეკლამად აღქმის საფუძველს იძლეოდა.