დღეს, 2 მაისს, საფეხბურთო მატჩის შემდეგ, გორის დილას სტადიონზე დილას გულშემატკივრებსა და თბილისის დინამოს ფანებს შორის დაპირისპირება მოხდა. რადიო თავისუფლების გორის კორესპონდენტის ინფორმაციით, დამტვრეულია სტადიონის ინვენტარი, ფანებმა ერთმანეთს სკამები და ქვები ესროლეს.

შინაგან საქმეთა სამინისტროში On.ge-ს უთხრეს, რომ შელაპარაკების ნიადაგზე დაიწყო ჩხუბი. საპატრულო პოლიცია ადგილზეა მობილიზებული, მათ კორდონები გააკეთეს, რათა მშვიდობიანად დაშალონ გულშემატკივრები.

უწყების ინფორმაციით, დაშავებული და დაკავებული არავინაა.

მატჩი ფრედ 1-1 დასრულდა. როგორც რადიო თავისუფლების ჟურნალისტი ამბობს, ბოლო წუთებში მინდორზეც იყო დაპირისპირება ფეხბურთელებს შორის, რაც მაყურებელშიც გადაიზარდა. სიტყვიერ შეურაცხყოფას მოჰყვა ფიზიკური დაპირისპირებაც გულშემატკივრებს შორის.

შინაგან საქმეთა სამინისტრომ მომხდარ ფაქტზე გამოძიება სისხლის სამართლის კოდექსის 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.