თბილისის სახელმწიფო უნივერსიტეტში წარმომადგენლობითი საბჭოს, იგივე სენატის არჩევნები დაიწყო. უნივერსიტეტის პრესსამსახური აცხადებს რომ 10:00 საათზე ყველა საარჩევნო უბანი გაიხსნა.

თსუ-შისენატის 33 ახალი წევრი უნდა აირჩიონ, აქედან 12 სტუდენტი, ხოლო 21 აკადემიური და სამეცნიერო პერსონალი. თსუ-ს საარჩევნო კომისიის თავმჯდომარის გიორგი ჩაკვეტაძის განცხადებით, მთლიანობაში ამომრჩეველთა რაოდენობა 28 781-ია.

აუდიტორია 115-ის წევრი ირაკლი კუპრაძე ფეისბუკზე სტუდენტებს მოუწოდებს რომ მივიდნენ არჩევნებზე და თავიანთი პოზიცია დააფიქსირონ.

უნივერსიტეტის განცხადებით, არჩევნები საქართველოს უმაღლესი განათლების შესახებ კანონსა და თსუ-ს წესდებაში შესული ცვლილებების თანახმად ტარდება და სენატის შემადგენლობა განისაზღვრა 74 წევრით (არანაკლებ თსუ აკადემიური საბჭოს შემადგენლობის (36 წევრი) ორჯერ მეტისა).

სენატის არჩევნები თსუ წარმომადგენლობითი საბჭოს (სენატი) შემადგენლობაში ფაკულტეტების წარმომადგენლების რაოდენობის ზრდის, დამოუკიდებელი სამეცნიერო-კვლევითი ერთეულების წარმომადგენლების შეყვანისა და ვადამდე უფლებამოსილებაშეწყვეტილი წევრების ნაცვლად ახალი წევრების არჩევის მიზნით იმართება.

კენჭისყრის პროცედურა 17:00 საათზე დასრულდება. საარჩევნო კომისია 23:00 საათამდე გამოავლენს გამარჯვებულ კანდიდატებს.