2015 წელს თბილისში ევროპის ახალგაზრდული ოლიმპიური ფესტივალი ჩატარდა და სამი წლის გასვლის შემდეგაც საორგანიზაციო კომიტეტის 120-მდე თანამშრომელს ხელფასი ამ დრომდე არ მიუღია. საუბარია, დაახლოებით, ნახევარ მილიონზე ლარზე, რაც თანამშრომლების სამი-ოთხი თვის ხელფასია.

სახელფასო დავალიანებასთან დაკავშირებით On.ge თბილისის მერიას დაუკავშირდა, რათა დაგვედგინა დღემდე რატომ არ არის სახელფასო დავალიანება გასტუმრებული. კითხვებზე პასუხი საჯარო ინფორმაციის სახითაც გამოვითხოვეთ, რამდენიმეთვიანი ლოდინის შემდეგაც პასუხი ამ დრომდე არ მიგვიღია.

თბილისის მერია და ორგანიზატორები თავს იწონებდნენ იმით, რომ 2015 წელს ღონისძიებამ მაღალ დონეზე ჩაიარა. მომზადებასა და ჩატარებაში შეტანილი წვლილისთვის საქართველოს ოლიმპიური ორდენით დაჯილდოვდა თბილისის იმჟამინდელი მერი, დავით ნარმანია. ასევე, ორდენი გადაეცა ევროპის ახალგაზრდული ოლიმპიური ფესტივალის "თბილისი 2015-ის" საორგანიზაციო კომიტეტის თავმჯდომარეს, ალექსი ახვლედიანს.

თბილისის ყოფილი მერი, დავით ნარმანია და "თბილისი 2015-ის" საორგანიზაციო კომიტეტის თავმჯდომარე ალექსი ახვლედიანი საქართველოს ოლიმპიური ორდენით დაჯილდოვდნენ.

ფოტო: თბილისი 2015 / Facebook

საორგანიზაციო კომიტეტის იურიდიული დეპარტამენტის ყოფილი ხელმძღვანელი, სალომე ბეჟაშვილი ერთ-ერთია, რომელიც ანაზღაურების გარეშე დარჩა. როგორც ის On.ge-სთან ყვება, სასამართლოში საერთო სარჩელი 80-მდე თანამშრომელმა შეიტანა.

სასამართლოზე მოპასუხე მხარე საორგანიზაციო კომიტეტი იყო, ხოლო თბილისის მერია საქმეში მესამე პირად ჩაერთო. 2017 წლის 14 სექტემბრის სასამართლოს გადაწყვეტილებით, თბილისის მერიას სახელფასო დავალიანების დაფარვა დაევალა, თუმცა ამ დრომდე სახელფასო დავალიანება დაფარული არ არის.

ჩაურიცხავ ხელფასებზე ბეჟაშვილი ამბობს, რომ ჯერ კიდევ 2015 წელს თბილისის მერიის დავალებით მარკეტინგული ღონისძიებისა და გაფორმებისთვის საორგანიზაციო კომიტეტს დამატებითი თანხების გაწევა მოუწიათ, რის გამოც ხელფასები ვერ ჩარიცხეს. მისივე თქმით, ვალების დასაფარად ცხრა მილიონი ლარი გამოიყო.

"მე ვიყავი შეხვედრაზე, რომელსაც დავით ნარმანია მოადგილეებთან ერთად ესწრებოდა. ზუსტად ამ თანხის გამოყოფის შემდეგ ასეთი მითითება მოგვცეს, რომ ეს ცხრა მილიონი ორი დღის ვადაში შესაბამისი კომპანიებისთვის გადაგვერიცხა. გადარიცხვის შემდეგ კი ხელფასებს დაადასტურებდნენ და ჩარიცხავდნენ".

"თბილისი 2015-ის" გახსნის ცერემონია

ფოტო: თბილისი 2015 / Facebook

როგორც ბეჟაშვილი ამბობს, ჯერ კიდევ თბილისის ყოფილი მერი, დავით ნარმანია დაპირდა, რომ სასამართლოს გადაწყვეტილებისთანავე თანხა ჩაირიცხებოდა. სამი წლის გასვლის შემდეგაც, ახალი მმართველობის პერიოდში კი პასუხი დღემდე არ მიუღია.

უხელფასოდ დარჩენილმა თანამშრომლებმა სასამართლოს გადაწყვეტილება აღსრულების ეროვნულ ბიუროშიც წარადგინეს.

ევროპის ახალგაზრდული ოლიმპიური ფესტივალის "თბილისი 2015-ის" საორგანიზაციო კომიტეტი ლიკვიდაციაში, თუმცა სანამ სახელფასო დავალიანება დაფარული არ იქნება ლიკვიდაციას ვერ დაასრულებს.

სალიკვიდაციო ჯგუფის თავმჯდომარემ, მიხეილ კორშიამ On.ge-ს უთხრა, რომ ორგანიზაციას დავალიანება აქვს ბიუჯეტის წინაშე და მას ქონება არ გააჩნია, რითაც ხელფასების გადახდა მოხერხდება.

On.ge შეეცადა დაკავშირებოდა საორგანიზაციო კომიტეტის თავმჯდომარეს, ალეკო ახვლედიანს, რათა გაერკვია რატომ აქვს კომიტეტს სახელფასო დავალიანება. თუმცა ახვლედიანი ჩვენს ზარებს არ პასუხობს.