ქართული ოცნების დეპუტატის ნუკრი ქანთარიას განცხადებით, საქართველოს პარლამენტის თავმჯდომარის ირაკლი კობახიძის განცხადებები ავტორიტარიზმის ნიშნებს შეიცავს.

ნუკრი ქანთარიას თქმით, გედევან ფოფხაძის პარტიიდან წასვლაზე პრემიერ-მინისტრის განცხადება მოეწონა, ხოლო პარლამენტის თავმჯდომარის არა.

"პრემიერ-მინისტრმა საკმაოდ კარგად, აბსოლუტურად, ამომწურავად გამოხატა სწორედ, პარტიის პოზიცია, როგორც თავმჯდომარემ, როგორც ლიდერმა და როგორც სწორედ უმრავლესობაზე მზრუნველმა ადამიანმა. პარლამენტის თავმჯდომარეს, ვფიქრობ, რიტორიკაში ჰქონდა რაღაც ავტორიტარული ნოტები, რაც, რა თქმა უნდა, ყოვლად მიუღებელია", - უთხრა რუსთავი 2-ის ჟურნალისტს ნუკრი ქანთარიამ.

მისი თქმით, მმართველმა პარტიამ ავტორიტარული ნოტებიც, რიტორიკაც და ქმედებაც 2012 წელს ჩააბარა.

"მისი რიტორიკა ვფიქრობ, რომ მიუღებელია და ამიტომ მან თავის თავზე უნდა იმუშაოს", - განაცხადა ნუკრი ქანთარიამ.

კითხვაზე, შესაძლებელია თუ არა დღის წესრიგში პარლამენტის თავმჯდომარის გადადგომის საკითხი დადგეს, ნუკრი ქანთარია პასუხობს, რომ გამორიცხული არაფერია.

"სულ ვამბობ, რომ ბუნებაში ყველაფერი მოსალოდნელია. დღეს მე ვარ და ხვალ შეიძლება არ ვიყო", - განაცხადა ნუკრი ქანთარიამ.

პარლამენტის თავმჯდომარეს მიაჩნია, რომ გედევან ფოფხაძემ თანაგუნდელებს, რელიგიური თემით სპეკულირების ფონზე, შეურაცხყოფა მიაყენა. მანამდე კი ქართული ოცნების წევრმა, გედევან ფოფხაძემ ნინია კაკაბაძის საზოგადოებრივი მაუწყებლის მეურვედ არჩევისას განაცხადა, რომ "შვიდეულის კვირაში ასეთი რამის გაკეთება არის ყველა მართლმადიდებლის სულში ჩაფურთხება."