2017 წელს საქართველოს ფინანსთა მინისტრის, მამუკა ბახტაძის სახელფასო ანაზღაურება 248 816 ლარი იყო. მიღებული შემოსავლების შესახებ მინისტრი 2018 წლის 31 მარტს შევსებულ დეკლარაციაში წერს.

მინისტრმა ყველაზე დიდი შემოსავალი საქართველოს რკინიგზის დირექტორის თანამდებობაზე, 2017 წლის პირველი იანვრიდან 12 ნოემბრამდე პერიოდში, მუშაობისას მიიღო. ამ პერიოდში მისი ხელფასი 184 151 ლარი იყო. ამავდროულად მუშაობდა შპს ჯიარ ტრანზიტ ლაინში და შპს ჯიარ ტრაზიტში, სადაც მისი ანაზღაურება 53 514 ლარი იყო. მინისტრმა ამ თანამდებობაზე გასულ წელს 10 თვე და 12 დღე იმუშავა და საშუალოდ თვეში 22 600 ლარს მიიღო.

მამუკა ბახტაძე ფინანსთა მინისტრად 2017 წლის 13 ნოემბრიდან მუშაობს, წლის ბოლომდე კი 11 151 ლარი გამოიმუშავა, ანუ, საშუალოდ თვეში 7 400 ლარი მიიღო, რაც 3-ჯერ ჩამორჩება წინა სამსახურიდან მიღებულ შემოსავალს.