ჭიათურაში პროფკავშირების ახალგაზრდული მოძრაობა და მაღაროელები საპროტესტო აქციას მართავენ. ისინი ხელფასების მატებასა და კოლექტიური ხელშეკრულებების გაფორმებას ითხოვენ.

პროფკავშირების განცხადებით, დასაქმებულებს დღეს, 29 მარტს ჯორჯიან მანგანეზის სპეციალური მმართველი, ნიკა ჩიქოვანი უნდა შეხვედროდა, თუმცა შეხვედრა ჩიქოვანის შეუძლოდ ყოფნის გამო ვერ შედგება.

დასაქმებულები და პროფკავშირები ამბობენ, რომ აქციაზე გაჟღერებული მოთხოვნების შეუსრულებლობის შემთხვევაში, ისინი სამართლებრივ დავას დაიწყებენ.

26 მარტს ჭიათურის მაღაროში გვირაბის ჩამონგრევის შედეგად მუშა დაიღუპა. პროფკავშირების ინფორმაციით, 45 წლამდე ზაზა აბრამიშვილი ნანგრევების ქვეშ მოყვა. როგორც მაღაროელები ამბობენ, მაღაროს ჭერიდან დიდი ზომის ლოდები ჩამოიშალა და ერთ-ერთი ლოდი სწორედ ზაზა აბრამიშვილს დაეცა. მაღაროელები ამბობენ, რომ უბანი რომელშიც ბრიგადა სამუშაოებს აწარმოებდა ავარიული იყო, თუმცა მაღაროს ადმინისტრაცია მუშებს მაინც ავალდებულებდა იქ მუშაობას.

გამოძიება სისხლის სამართლის კოდექსის 240-ე მუხლით დაიწყო. მუხლი გულისხმობს უსაფრთხოების წესის დარღვევას სამთო, სამშენებლო ან სხვა სამუშაოს წარმოებისას, რამაც გამოიწვია ადამიანის სიცოცხლის მოსპობა ან სხვა მძიმე შედეგი. დანაშაული ისჯება თავისუფლების შეზღუდვით ვადით ხუთ წლამდე ან თავისუფლების აღკვეთით ვადით ორიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.