დღეს, 23 მარტს, პარლამენტის სხდომაზე, კონსტიტუციაში დაგეგმილი ცვლილებების პროექტის განხილვისას, პატრიოტთა ალიანსის წევრმა, ადა მარშანიამ ირაკლი კობახიძეს უწიფარი პარლამენტის თავმჯდომარე უწოდა:

"არგუმეტი, რაც მე მოვისმინე, ისეთი სირცხვილია, რომ გაჟღერებაც არ მინდა. საფუძველი მაქვს, თქვენ დიდი უნდობლობა გამოგიცხადოთ და საერთოდ, ამ პარლამენტში თქვენს წინააღმდეგ იმპიჩმენტის პროცედურა დავიწყო. ძალიან ადრე იყო თქვენთვის პარლამენტის თავმჯდომარეობა".

ადა მარშანიამ კონსტიტუციაში არსებული იმ ჩანაწერის შეცვლას ითხოვს, რომლის თანახმად, "საქართველოს სახელმწიფო ენა არის ქართული, ხოლო აფხაზეთის ავტონომიურ რესპუბლიკაში - აფხაზური". მარშანიას წინადადებით, საქართველოს სახელმწიფო ენა უნდა ეწეროს ქართული, ხოლო აფხაზეთის ავტონომიურ რესპუბლიკაში - ქართული და აფხაზური.

"ეს ჩანაწერი უფრო აკადემიური, უფრო დაბალანსებულია, უფრო ლამაზია“, - ამბობს ადა მარშანია.

ირაკლი კობახიძის თქმით, არსებული ჩანაწერი გამართულია და შინაარსს სწორად ასახავს:

"მივმართავ პატრიოტთა ალიანსს, ჩვენ ბევრად უკეთ გვესმის ეროვნული ინტერესები, ვიდრე თქვენ. ეს შემიძლია დაბეჯითებით გითხრათ".