უკრაინის გენერალურმა პროკურატურამ მიხეილ სააკაშვილის საქმის გამოძიება შეაჩერა. უწყებამ გადაწყვეტილება 6 მარტს მიიღო.

პროკურატურის დადგენილებაში ნათქვამია, რომ წინასასამართლო სისხლის სამართლის გამოძიება სააკაშვილის წინააღმდეგ შეჩერდა, რათა "პროცესუალური ქმედებები საერთაშორისო თანამშრომლობის ჩარჩოებში შესრულდეს".

პირველ მარტს მიხეილ სააკაშვილის ადვოკატებმა გენერალურ პროკურატურას მიმართეს, რათა საქართველოს ექსპრეზიდენტის წინააღმდეგ აღძრული კურჩენკოს ფულის საქმე შეეწყვიტათ.

უკრაინის სამართალდამცავი ორგანოები სააკაშვილს ბიზნესმენ სერგეი კურჩენკოსგან, ნახევარი მილიონი დოლარის მიღებას ედავებოდნენ. გამოძიებას მიაჩნდა, რომ ეს თანხა სააკაშვილმა საპროტესტო აქციების დასაგეგმად გამოიყენა.

12 თებერვალს სააკაშვილი უკრაინაში, რესტორანში დააკავეს. უკრაინის საზღვრის სამსახურმა გაავრცელა ინფორმაცია იმის შესახებ, რომ მას რეადმისიის პრინციპით დააბრუნებდნენ პოლონეთში, იმ ქვეყანაში, რომლიდანაც შევიდა უკრაინაში.

სააკაშვილის თქმით, ის უკრაინის სამართალდამცავმა ორგანოებმა ძალის გამოყენებით ჩასვეს თვითმფრინავში და ისე გააფრინეს პოლონეთში. მოგვიანებით სააკაშვილი პოლონეთიდან ნიდერლანდებში გადავიდა, სადაც მოქალაქეობა და ევროკავშირის ქვეყნებში ცხოვრების და მუშაობის უფლება მიიღო.

უკრაინაში შესვლა სააკაშვილს 2021 წლის 13 თებერვლამდე აქვს აკრძალული.