დარიალის ხეობაში დასასრულს მიუახლოვდა სტიქიით დაზიანებული მცხეთა-სტეფანწმინდა-ლარსის დამაკავშირებელი გზის აღდგენა. როგორც On.ge-ს საავტომობილო გზების დეპარტამენტში განუცხადეს, დროებითი გზა დღეს, დაახლოებით 17:00 საათზე გაიხსნება.

საავტომობილო გზების დეპარტამენტის ცნობით, სპეციალისტებმა მდინარე თერგი თავის კალაპოტში დააბრუნეს, ავტომობილებისთვის კი დროებითი, გრუნტის გზა გააკეთეს, რათა ავტომობილებმა შეძლონ გადაადგილება საქართველოდან რუსეთის მიმართულებით და პირიქით.

სტიქიის სალიკვიდაციო სამუშაოებს საქართველოს რეგიონული განვითარებისა და ინფრასტრუქტურის სამინისტროს შპს სახელმწიფო სამშენებლო კომპანია და საავტომობილო გზების დეპარტამენტის შესაბამისი სამსახურები ახორციელებენ.

23 ივნისს, ძლიერი წვიმების შედეგად, დევდარაკის ხევიდან მოვარდნილმა ღვარცოფმა მდინარე თერგს კალაპოტი შეუცვალა. მოვარდნილმა წყალმა მცხეთა-სტეფანწმინდა-ლარსის საავტომობილო გზის 800 მეტრიანი მონაკვეთი წაიღო. სტიქიური პროცესების გააქტიურების გამო მცხეთა-სტეფანწმინდა-ლარსის საავტომობილო გზაზე, 134-ე და 135-ე კილომეტრების მონაკვეთზე დარიალის ხეობაში ავტოტრანსპორტის მოძრაობა აიკრძალა.

გზის განადგურებამ მნიშვნელოვანი პრობლემა შეუქმნა როგორც მგზავრებს, ისე ტვირთების გადამზიდავებს საქართველოდან და სომხეთიდან.