შესწორება: ნიუსის თავდაპირველ სათაურში ეწერა "პრეზიდენტი: მალე შვეიცარიასთან თავისუფალი ვაჭრობა და უვიზო მიმოსვლა გვექნება". პრეზიდენტის პრესსამსახურში აცხადებენ, რომ უვიზო მიმოსვლაზე პრეზიდენტის განცხადება ტექნიკური შეცდომა იყო. საქართველოს შვეიცარიასთან, როგორც შენგენის ზონის წევრთან, უვიზო მიმოსვლა გასული წლიდან აქვს.

საქართველოს პრეზიდენტმა გიორგი მარგველაშვილმა შვეიცარიის კონფედერაციის პრეზიდენტთან დორის ლოიტჰარდთან შეხვედრისას განაცხადა, რომ სულ მალე საქართველოსა და შვეიცარიას შორის თავისუფალი ვაჭრობა იქნება:

"ჩვენთვის მნიშვნელოვანია თანამშრომლობა ქვეყანასთან, რომელიც მტკიცედ უჭერს მხარს საქართველოს სუვერენიტეტს და მნიშვნელოვან როლს თამაშობს საქართველოსა და რუსეთის ფედერაციას შორის დიალოგის არსებობის თვალსაზრისით".

პრეზიდენტის თქმით, შვეიცარიის განვითარების სააგენტო არის მხარე, რომელმაც ოცი წლის განმავლობაში ასეულობით მილიონი დოლარი დაახარჯა საქართველოს განვითარებას და ამას აგრძელებს მომავალში.

მომავალი წლის დასაწყისში აღნიშნული თავისუფალი ვაჭრობის შეთანხმება ამოქმედდება, იმედი მაქვს ძალიან ბევრი შვეიცარიელი ინვესტორი გამოიხედავს საქართველოსკენ.

შვეიცარიის კონფედერაციის პრეზიდენტი, დორის ლოიტჰარდი

შვეიცარიის პრეზიდენტმა, დორის ლოიტჰარდმა განცხადა, რომ მომავალი წლის დასაწყისში თავისუფალი ვაჭრობის შეთანხმება ამოქმედდება:

"რა თქმა უნდა, რაც თქვენ მოახერხეთ აღნიშვნის ღირსია. შესაძლებლობების შემდგომი განვითარება, ჩვენი ორმხრივი ურთიერთობებისა სხვადასხვა მემორანდუმის დონეზე, ბატონმა პრეზიდენტმა აღნიშნა ვიზალიბერალიზაცია, თავისუფალი ვაჭრობის მემორანდუმი, ასევე ეკონომიკური ურთიერთობები, ეს გაიზრდება სამომავლოდ. იმედი მაქვს, ძალიან ბევრი შვეიცარიელი ინვესტორი გამოიხედავს საქართველოსკენ".

ფოტო: გვანცა ნემსაძე / On.ge

მისივე თქმით, საქართველოს აქვს ძალიან დიდი ინფრასტრუქტურული პროექტების განხორციელების შესაძლებლობა:

"შავი ზღვა არის ამოუწურავი რესურსი. შვეიცარია არის ლოგისტიკური ქვეყანა და ჩვენ შეგვიძლია ჩვენი გამოცდილება, ექსპერტიზა გაგიზიაროთ. ჩვენ გვაქვს სამხრეთ კავკასიის მხარდაჭერის სტრატეგია".

საქართველოს ოკუპირებული ტერიტორიები, რუსეთის ანექსიური, აგრესიული, პროვოკაციული ქმედებები და შვეიცარიის განსაკუთრებული როლი საქართველო - რუსეთის ურთიერთობების საკითხებში - აღნიშნული თემები დღეს საქართველოს პრეზიდენტმა გიორგი მარგველაშვილმა შვეიცარიის კონფედერაციის პრეზიდენტთან დორის ლოიტჰარდთან პრეზიდენტის სასახლეში პირისპირ შეხვედრისას განიხილა.

საქართველოს პრეზიდენტმა ორ ქვეყანას შორის არსებული პოტენციალის გამოყენების შესაძლებლობის განხილვის თვალსაზრისით შვეიცარიის კონფედერაციის პრეზიდენტის ვიზიტს მნიშვნელოვანი უწოდა და აღნიშნა, რომ საქართველო-შვეიცარიის 25-წლიანი დიპლომატიური ურთიერთობები წარმატებით ვითარდება.