სასტუმრო ლეოგრანდის ერთ-ერთი თანამშრომლის თქმით, შენობაში შუქის გათიშვის შემდეგ კარები ჩაიკეტა, რის გამოც მოძრაობა შეუძლებელი გახდა. მისივე თქმით, სასტუმროს ორი სამაშველო კიბე აქვს.

"ჩვენ უსაფრთხოების სისტემა გვაქვს. უბრალოდ ჩაიკეტა ყველა სისტემა. განსაკუთრებით სპა ნაწილში დარჩა ხალხი", - ამბობს სასტუმროს თანამშრომელი საზოგადოებრივი მაუწყებლის აჭარის ტელევიზიასთან.

სასტუმრო ლეოგრანდში გაჩენილი ხანძრის შედეგად, გარდაცვლილია 11 ადამიანი, მათ შორის, 10 საქართველოს, ხოლო ერთი ირანის რესპუბლიკის მოქალაქე. აჭარის ტელევიზიის ინფორმაციით, გვამების ნაწილის იდენტიფიცირება უკვე დასრულებულია.

შინაგან საქმეთა მინისტრმა, გიორგი გახარიამ განაცხადა, რომ შენობაში სახანძრო ნორმები და მოთხოვნები დარღვეული იყო.

სასტუმრო ლეოგრანდში ხანძარი 24 ნოემბერს, დაახლოებით 20 საათზე გაჩნდა და ძლიერი კვამლი მალევე მოედო მთელ შენობას. მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს.