30 წლის ლუიზიანელი დედა შექუანა სპირზი პოლიციამ მას შემდეგ დააკავა, რაც მან თავისი 3 ვაჟი მეზობლის სახლში შეპარვისა და ნივთების მოპარვის გამო ქამრითა და მავთულის კაბელით სცემა.

სპირზს მოზარდების მიმართ სასტიკი მოპყრობა ედება ბრალად. მისი შვილები 10, 12 და 13 წლისანი არიან.

ადგილობრივმა სამართალდამცავმა ABC News-ს განუცხადა, რომ გადაწყვეტილების გამოტანამდე სასამართლო საქმეში არსებულ ყველა დეტალს განიხილავს და ისე გადაწყვეტს სპირზისთვის შესაბამის სასჯელს.

თავად დედა აცხადებს, რომ ის მის შვილებს სწორ და არასწორ საქციელებს შორის განსხვავებას ასწავლიდა.

"ვერასდროს წარმოვიდგენდი, რომ იმის გამო დამაპატიმრებდნენ, რომ ვცდილობდი ვყოფილიყავი კარგი დედა ჩემი შვილებისთვის. მე მათთვის ვცხოვრობ" - თქვა მან მას შემდეგ, რაც განაჩენის გამოტანამდე გაათავისუფლეს.

დეტექტივების თქმით, ბავშვებს მკლავები, მხრები, მუცელი და ზურგი ცემის შედეგად ზოლებად აქვთ დალურჯებული, 12 წლის შვილს კი ცემისგან მკლავზე ჭრილობა აქვს.

დაზარალებული მეზობლის თქმით, რომლის სახლშიც ბავშვები შეიპარნენ, სპირზის დაკავება სამწუხარო ამბავი იყო, რადგან ის კარგი დედაა და მისი აზრით, ის სწორად მოიქცა.