23 ივნისს, გვიან მოვარდნილმა ღვარცოფმა მდინარე თერგის კალაპოტის შეცვლა გამოიწვია. ადიდებულმა მდინარის წყალმა დარიალის ხეობაში, რუსეთის საზღვრისკენ მიმავალი გზის მონაკვეთი გაანადგურა.

შინაგან საქმეთა სამინისტროს ინფორმაციით, მთაში ღვარცოფის წარმოქმნის საშიშროების შესახებ შეტყობინება შესაბამისმა უწყებებმა დროულად მიიღეს, რის შემდეგაც დროულად დაიკეტა სამანქანო გზა, ტერიტორიიდან გაიყვანეს ტურისტები, ადგილობრივები და ლარსის სასაზღვრო-გამშვები პუნქტის თანამშრომლები. სტიქიის შედეგად არავინ დაშავებულა.

მოსახლეობის უსაფრთხოების დაცვის მიზნით, გზის აღნიშნულ მონაკვეთზე საავტომობილო მოძრაობა დაიკეტა. ავტომანქანების გადაადგილება ნებადართულია სოფელ გველეთამდე. მომხდართან დაკავშირებით, სასაზღვრო-გამშვები პუნქტი დარიალი ორივე მიმართულებით დაკეტილია. შინაგან საქმეთა სამინისტროს ორი ვერტმფრენი უკვე ჩაერთო სამაშველო ღონისძიებაში.