ვამპირის დღიურების, განსაკუთრებით კი სტელენას ფანებისთვის, კარგი ამბავი გვაქვს: ნინა დობრევი და პოლ უესლი ეკრანებზე ახალი პროექტით ბრუნდებიან. მსახიობები აგი ბლუმ ტომპსონის 2025 წლის რომანის You Deserve to Know სატელევიზიო ადაპტაციაში კვლავ ერთად ითამაშებენ.

You Deserve to Know მოგვითხრობს გარეუბანში მცხოვრებ სამ წყვილზე — მეზობლებსა და საუკეთესო მეგობრებზე. როდესაც ერთ-ერთი მეზობლის ქმარს კლავენ, შოკისმომგვრელი საიდუმლოებები მჟღავნდება და მეზობლების მეგობრობაც ეჭვის ქვეშ დგება. ნინა დობრევი და პოლ უესლი ახალ სერიალში მეზობლებს განასახიერებენ. მკვლელობის გამოძიებისას ისინი საპირისპირო მხარეს აღმოჩნდებიან, რაც საბოლოოდ კონფლიქტის საფუძველი ხდება.

ფოტო: X

გარდა როლების შესრულებისა, ნინა დობრევი და პოლ უესლი სერიალის აღმასრულებელი პროდიუსერებიც იქნებიან. You Deserve to Know-ს სცენარისტი ბრაიან ტანენია, პროექტს კი Hulu იღებს.

"ამ ამბის გაზიარებას მოუთმენლად ველოდი. მე და პოლ უესლი კვლავ ვერთიანდებით, რათა You Deserve to Know-ში ვითამაშოთ და მისი აღმასრულებელი პროდიუსერებიც ვიყოთ. ადაპტაციის შექმნაში კამერის ორივე მხრიდან მუშაობა ძალიან ამაღელვებელია. უღრმესი მადლობა ჩვენს პარტნიორებს", — ვკითხულობთ ნინა დობრევის ინსტაგრამის პოსტში.

მიუხედავად იმისა, რომ ნინა დობრევი ვამპირის დღიურებში მთავარ როლს ასრულებდა, მას არასდროს ჰქონია ისეთი მაღალი ანაზღაურება, როგორიც სერიალში მონაწილე კაც მსახიობებს — იან სომერჰოლდერსა და პოლ უესლის. ამ ფაქტის შესახებ ნინამ შოუს დატოვებიდან რამდენიმე წლის შემდეგ ისაუბრა.

"პირველი ორი სეზონის განმავლობაში ძირითადი შემადგენლობიდან ყველაზე დაბალი ანაზღაურება მე, კენდის კინგსა და კეტს გრეჰემს გვქონდა. ცოტა რთული სიტუაცია შეიქმნა, რადგან ჩემი კონტრაქტი მხოლოდ ელენას როლს ითვალისწინებდა, თუმცა მე რამდენიმე პერსონაჟს ვასახიერებდი, რამაც ჩემი სამუშაო დატვირთვა გააორმაგა. გადასაღებ მოედანზე ორჯერ მეტი დროის გატარება და ორჯერ მეტი ტექსტის დამახსოვრება მიწევდა. კეტრინის თამაში ძალიან მინდოდა, მაგრამ ასევე ვითხოვდი სამართლიან ანაზღაურებას, რათა ჩემი შრომაც ბიჭების მსგავსად, თანაბრად დაფასებულიყო", — განაცხადა ნინა დობრევმა.

ფოტო: CW

შეგახსენებთ, რომ ნინა დობრევმა ვამპირის დღიურები მე-6 სეზონის დასრულებისას, 2015 წლის მაისში დატოვა. ის პროექტს მხოლოდ სერიალის დასკვნითი სერიისთვის დაუბრუნდა და მე-8 სეზონის ფინალური ეპიზოდში კვლავ მიიღო მონაწილეობა.