"ჩვენ გავაგრძელებთ ევროკავშირთან დაახლოების კურსს, თუმცა ასევე გავაგრძელებთ ჩვენს მონაწილეობასა და წევრობას ევრაზიულ ეკონომიკურ კავშირში და განვაგრძობთ ურთიერთობების განვითარებას რუსეთთან" — ამის შესახებ სომხეთის პრემიერმინისტრმა, ნიკოლ ფაშინიანმა პრესკონფერენციაზე განაცხადა. ინფორმაციას Armenpress ავრცელებს.

როგორც სომხური მედია წერს, ფაშინიანმა რუსულ გაზეთ "იზვესტიას" კითხვას უპასუხა, რომელიც სომხეთის ევროკავშირთან დაახლოების პოლიტიკას ეხებოდა.

"ჩვენ გავაგრძელებთ ევროკავშირთან დაახლოების კურსს, თუმცა ასევე გავაგრძელებთ ჩვენს მონაწილეობასა და წევრობას ევრაზიულ ეკონომიკურ კავშირში და განვაგრძობთ ურთიერთობების განვითარებას რუსეთთან და ევრაზიული ეკონომიკური კავშირის სხვა წევრ სახელმწიფოებთან. რა თქმა უნდა, ჩვენ ხელს შევუწყობთ კავშირების გაძლიერებას ევრაზიული ეკონომიკური კავშირის ფარგლებში," — განაცხადა ფაშინიანმა.

კითხვაზე, ესაუბრა თუ არა რომელიმე დასავლელ ლიდერს სომხეთის საპარლამენტო არჩევნების წინასწარი შედეგების გამოქვეყნების შემდეგ, ფაშინიანმა განაცხადა, რომ მას უკვე ჰქონდა არაფორმალური საუბარი საფრანგეთის პრეზიდენტ ემანუელ მაკრონთან. გარდა ამისა, პრემიერმინისტრმა აღნიშნა, რომ არაფორმალური საუბარი გამართა საქართველოს პრემიერმინისტრ ირაკლი კობახიძესთანაც.

ცნობისთვის, სომხეთში საპარლამენტო არჩევნები ჩატარდა, რომელიც კვირას, 7 ივნისს გაიმართა. გავრცელებული მონაცემების მიხედვით, პირველ ადგილზე ფაშინიანის მმართველი პარტია "სამოქალაქო კონტრაქტი" გავიდა ხმების 49.81%-ით.