სომხეთის სამართალდამცავმა ორგანოებმა დაიწყეს სისხლის სამართლის საქმის გამოძიება იმ პირების იდენტიფიცირებისა და დაკავების მიზნით, რომლებიც ონლაინ გავრცელებულ ვიდეოში პრემიერმინისტრ ნიკოლ ფაშინიანს, სავარაუდო მკვლელობის შეთქმულების ფარგლებში, სიკვდილით დაემუქრნენ. ინფორმაციას სომხური მედია ავრცელებს.

ვიდეოში ჩანს ნიღბიანი კაცი, რომელიც საუბრობს, ხოლო მის უკან კიდევ ოთხი ნიღბიანია და ხელში AKS-74U ტიპის ავტომატები უჭირავთ. საგამოძიებო კომიტეტმა პრესრელიზში განაცხადა, რომ პირებმა უკანონოდ მოიპოვეს წვდომა შეზღუდული კომპიუტერული ქსელის მონაცემებზე, რათა ვიდეო პირდაპირ ეთერში გაეზიარებინათ. კომიტეტის განცხადებაში ნათქვამია:

"სიძულვილითა და შეუწყნარებლობით მოტივირებულებმა, ხულიგნურად პირდაპირი ეთერში გაავრცელეს მუქარის შემცველი ვიდეო, რომელიც სომხეთის რესპუბლიკის პრემიერმინისტრის წინააღმდეგ მკვლელობის რეალურ საფრთხეს წარმოადგენს, რაც დაკავშირებულია მის სახელმწიფოებრივ და პოლიტიკურ საქმიანობასთან და განპირობებულია მისი პოლიტიკური შეხედულებებით".

ვიდეოში ნიღბიანი კაცი ფაშინიანს მიმართავს და ამბობს: "ჩვენ ვიცით, სად და როდის მიდიხართ... თქვენ უნდა უპასუხოთ თქვენს ყოველ ნაბიჯზე".

სისხლის სამართლის საქმე აღიძრა სავარაუდო მკვლელობის შეთქმულების (მკვლელობის ჩადენის შეთქმულების), ასევე კომპიუტერული სისტემის დივერსიის და ცეცხლსასროლი იარაღისა და საბრძოლო მასალის უკანონო ბრუნვის ფაქტებთან დაკავშირებით. მიმდინარეობს გამოძიება ეჭვმიტანილების იდენტიფიცირებისთვის.

გავრცელებულ ვიდეოს გამოეხმაურა თავად ფაშინიანი:

"მათ ნიღბები ეკეთათ, თითქოს ძლიერი კაცები არიან. მაგრამ იცით, რატომ უკეთიათ ნიღბები? რადგან როგორც კი მოიხსნიან, დავინახავთ, რომ სწორედ მათ მიატოვეს ჩვენი ჯარისკაცები [ბრძოლის ველზე] და გაიქცნენ შეშინებულები. არ გამოვრიცხავ, რომ ისინიც მათ ზურგში ესროდნენ. მიდით, მოიხადეთ ნიღბები, გამოდით — ვნახო ვინ ხართ. სომხეთში ნიღბებით მოდიხართ და ვიდეოებს ავტომატებით იღებდით? თითოეულ თქვენგანს ვიპოვი. მოიხსენით ნიღბები და ნებაყოფლობით წარდექით ჩვენს წინაშე. თქვენ დატოვეთ ჩვენი შვილები საომარ პოზიციებზე მარტოები და გაიქეცით, ნაძირალებო. თქვენ გაიქეცით Ferrari-ს სიჩქარით — ვინ ხართ? თქვენ მოდიხართ იმის სათქმელად, რომ ჩვენი შვილები გავწირეთ? თქვენ ხართ ისინი, ვინც გაიქცა პოზიციებიდან. თითოეულ თქვენგანს დაგაჩოქებთ, პასუხს მოგთხოვთ ჩვენი შვილების მარტო დატოვების და გაქცევისთვის", — თქვა ფაშინიანმა.