"მოხარული ვარ, ტრამპ თაუერ თბილისის ოფიციალური რენდერი გაგიზიაროთ" — აშშ-ის პრეზიდენტის დონალდ ტრამპის შვილი, The Trump Organization-ის აღმასრულებელი ვიცე-პრეზიდენტი, ერიკ ტრამპი "ტრამპ თაუერ თბილისის" პროექტის ოფიციალურ რენდერს აქვეყნებს. ამის შესახებ ერიკ ტრამპი X-ზე წერს.

"მოხარული ვარ, ტრამპ თაუერ თბილისის ოფიციალური რენდერი გაგიზიაროთ. საუკეთესო ადგილმდებარეობით, თბილისის გულში, ეს ცათამბჯენი მალევე იქცევა ღირსშესანიშნაობად, როგორც ყველაზე მაღალი შენობა საქართველოში. ეს ჩვენი პირველი პროექტია რეგიონში და ძალიან გვიხარია მისი განხორციელება!" — განაცხადა მან.

შეგახსენებთ, რომ The Trump Organization-ის ცნობით, მათთან თანამშრომლობით, კომპანიები Biograpi Living, Archi, The Sapir Organization, Blox და Finvest Georgia პროექტ Trump Tower Tbilisi-ს მშენებლობას აანონსებენ.

როგორც ტრამპის ორგანიზაცია წერს, შენობის დიზაინზე მსოფლიოს უმსხვილესმა არქიტექტურულმა ფირმა Gensler-მა იმუშავა. მათივე ინფორმაციით, დაგეგმილია, რომ ცათამბჯენი დაახლოებით 70-სართულიანი უნდა იყოს, რითაც ის საქართველოში ყველაზე მაღალი ნაგებობა გახდება.