თბილისის მერმა, კახა კალაძემ დაადასტურა, რომ უახლოეს დღეებში საქართველოში ამერიკის შეერთებული შტატების სახელმწიფო დეპარტამენტის დელეგაციას ელოდებიან. მისი თქით, აღნიშნული ვიზიტი განიხილება, როგორც სტრატეგიული პარტნიორობის განახლებისა და "ახალი ფურცლიდან" დაწყების შესაძლებლობა.

კახა კალაძის განმარტებით, პოზიტიური მოლოდინების საფუძველს იძლევა ბოლო პერიოდში განხორციელებული მაღალი დონის დიპლომატიური კომუნიკაცია. მან ხაზგასმით აღნიშნა, რომ საქართველო მზად არის ორმხრივი, თანასწორი პარტნიორობისთვის.

"ოპტიმისტური მოლოდინი მაქვს, რასაც აჩენს ის სატელეფონო ზარი, რომელიც განხორციელდა პრემიერმინისტრ ირაკლი კობახიძესა და აშშ-ის სახელმწიფო მდივანს მარკო რუბიოს შორის, გაჟღერებული მესიჯები და ა.შ. შესაბამისად, დაველოდოთ. ჩვენ მზად ვართ, რომ ორ ქვეყანას შორის ურთიერთობები ახალი ფურცლიდან დაიწყოს. ჩვენთვის მნიშვნელოვანია მეგობრობა, სტრატეგიული პარტნიორობა და რაც მთავარია, ეს ყველაფერი უნდა იყოს ორმხრივი", — განაცხადა კალაძემ.

არსებული ინფორმაციით, სახელმწიფო დეპარტამენტის დელეგაცია თბილისს მომავალ კვირას ეწვევა. "ტვ პირველის" ცნობით, მიუხედავად იმისა, რომ დელეგაციის სრული შემადგენლობა ჯერ ოფიციალურად არ სახელდება, ცნობილია — შეხვედრების ძირითადად ეკონომიკურ მიმართულებებს შეეხება. მათივე ინფორმაციით, დელეგაციის წევრები ოპოზიციისა და სამოქალაქო საზოგადოების წარმომადგენლებს შეხვდებიან.

შეგახსენებთ, 30 მარტს ირაკლი კობახიძე მარკო რუბიოს ტელეფონით ესაუბრა.

აშშ-ის სახელმწიფო დეპარტამენტის ცნობით, მხარეებმა განიხილეს უსაფრთხოების გამოწვევები კავკასიისა და შავი ზღვის რეგიონში. ირაკლი კობახიძემ საუბარს "პროდუქტიული" უწოდა და აღნიშნა, რომ მთავარი აქცენტი პარტნიორობის გადატვირთვასა და საქართველოს, როგორც რეგიონში ძლიერი მოკავშირის, როლის განმტკიცებაზე გაკეთდა.