თბილისის მერი კახა კალაძე მიიჩნევს, რომ თბილისში მდებარე ცხოველთა მუნიციპალურ თავშესაფარში, გუშინ მოქალაქეთა ერთი ჯგუფის მიერ განხორციელებული ქმედებები კატეგორიულად მიუღებელია.

მისი თქმით, "ამ ტიპის ნაბიჯებითა და ქმედებებით სიძულვილს იწვევენ საზოგადოებაში, თუნდაც მიუსაფარი ცხოველების მიმართ, არ შეიძლება ამ ტიპის შიზოფრენიული დამოკიდებულება".

"გუშინ ლილოს თავშესაფარში რაც მოხდა, კატეგორიულად მიუღებელი და წარმოუდგენელია. ადამიანები შეიჭრნენ იქ, სადაც განთავსებულნი არიან, ზოგი ცოფის, ზოგი სხვა მძიმე ავადმყოფობის გამო, დაკვირვების ქვეშ მყოფი ცხოველები.

ის ქმედებები და დამოკიდებულება, რაც ვიხილეთ — სპეკულაციები, სიცრუე, ტყუილის გავრცელება — კატეგორიულად მიუღებელია.

ამ ტიპის ნაბიჯებითა და ქმედებებით სიძულვილს იწვევენ საზოგადოებაში, თუნდაც მიუსაფარი ცხოველების მიმართ, არ შეიძლება ამ ტიპის შიზოფრენიული დამოკიდებულება, რაც ჩვენ კონკრეტული ადამიანებისგან ვიხილეთ", — განაცხადა კახა კალაძემ.

მან ხაზი გაუსვა, რომ მიუსაფარი ცხოველების პრობლემის მოსაგვარებლად, მუნიციპალიტეტი მრავალ ნაბიჯს დგამს.

"ლილოში მიმდინარეობს შესაბამისი ინფრასტრუქტურული სამუშაოები, რის შედეგადაც თავშესაფარი გაფართოვდება და ძალიან მალე გვექნება შესაძლებლობა, რომ დამატებით 300 ძაღლისთვის ვოლიერები გაკეთდეს.

გარდა ამისა, გლდანის რაიონში ხორციელდება ახალი თავშესაფრის პროექტი, რომელიც 500 ძაღლზეა გათვლილი. ეს ყველაფერი კეთდება იმისთვის, რომ ამ მიმართულებით არსებული გამოწვევები დაიძლიოს და მოსახლეობას ჩვენი მხრიდან ჰქონდეს მაქსიმალური ხელშეწყობა და თანადგომა ამ საკითხში.

კვლავ გავიმეორებ, რომ ის, რაც სტერილიზაცია-კასტრაციის მიმართულებით ბოლო წლებში დედაქალაქის მუნიციპალიტეტმა გააკეთა, არასდროს გაკეთებულა, ეს მისასალმებელია და წინ გადადგმული ნაბიჯებია", — განაცხადა კახა კალაძემ.

ცნობისათვის, გუშინ ცხოველთა უფლებადამცველები თბილისის მუნიციპალურ თავშესაფარში მივიდნენ. ლეიბორისტული პარტიის წევრმა, ლაშა ჩხარტიშვილმა სოციალურ ქსელში ვიდეო გაავრცელა. მისი ინფორმაციით, მოქალაქეებს მიკედლებული ცხოველების დაბრუნება სურდათ. ცხოველთა უფლებადამცველები აცხადებდნენ, რომ ადგილზე ანტისანიტარიაა და მიუსაფარ ცხოველებს ვეტერინარების სასწრაფო დახმარება სჭირდებათ.

მომხდარს თბილისის მერია გამოეხმაურა. მათი განცხადებით, მოქალაქეებმა ვოლიერებიდან გამოიყვანეს როგორც დაავადებული ძაღლები, ასევე ცოფის ვირუსზე დაკვირვების ქვეშ მყოფი ცხოველები, რაც "როგორც უსაფრთხოების ნორმების, ისე კანონის უხეში დარღვევაა და ამას შესაბამისი რეაგირება მოჰყვება