მოდის სამყაროში არსებობენ ადამიანები, რომლებიც ტრენდებს უბრალოდ მიჰყვებიან და არსებობს ჰეილი ბიბერი, რომელიც მათ აწესებს. ის უბრალოდ მოდელი კი არა, ნამდვილი "ტრენდსეტერია", რომელმაც ზუსტად იცის, როგორ მართოს ჩვენი სურვილები.

მოდით, გადავხედოთ იმ ვირუსულ ტრენდებს, რომლებმაც ჰეილი ბიბერი ჩვენი დროის მარკეტინგის გენიოსად აქცია:

1. "მომინანქრებული დონატის" ეფექტი

ყველაფერი ერთი ფრაზით დაიწყო, რომელიც დღემდე ჰეილის სილამაზის ფილოსოფიად რჩება: "თუ ძილის წინ ჩემი სახე მომინანქრებული დონატივით არ ბზინავს, ესე იგი, რაღაცას არასწორად ვაკეთებ". ამ სიტყვებით დაიწყო Glazed Donut Skin-ის ერა. ჰეილიმ აუდიტორიას დააჯერა, რომ ტონალურის სქელი ფენა წარსულს ჩაბარდა, მთავარი კი კანის მაქსიმალური დატენიანებაა.

სწორედ აქედან დაიწყო ცნობილი Clean Girl ესთეტიკაც — გადატკეცილი თმა, მინიმალისტური ოქროს საყურეები და სახე, რომელიც ბზინავს.

2. მარწყვის მაკიაჟი

როდესაც ჰეილიმ "მარწყვის მაკიაჟის" ტრენდი დაიწყო, მან ფერების ფსიქოლოგია გამოიყენა. ბევრი ვარდისფერი ბლაში ლოყებზე, დახატული ჭორფლები და მარწყვისფერი ტუჩები — ეს არის იმიჯი, რომელიც ადამიანში მაშინვე სიახლის, სიტკბოსა და ზაფხულის ასოციაციებს იწვევს.

შედეგად, ჰეილის Strawberry Peptide Lip Treatment გაყიდვების რეკორდებს ხსნის.

3. ფოტოები, რომლებსაც სუნი აქვს

შეგინიშნავს, რომ ჰეილი თავის კრემებსა და ტუჩსაცხებს ხშირად შოკოლადის ფილის, გამდნარი კარამელის, მარწყვის ან არომატული ჩაის გვერდით დებს? ეს შემთხვევითობა სულაც არ გეგონოთ. ეს ერთგვარი მარკეტინგული ხრიკია, რომელიც პირდაპირ ჩვენს არაცნობიერ სურვილებზე მოქმედებს.

როცა ფოტოს უყურებ, შენი ტვინი მხოლოდ სურათს კი არ ხედავს, არამედ ავტომატურად გრძნობს იმ პროდუქტის სუნსა და გემოს, რომელიც კადრშია. თუ ტუჩსაცხი ყავასთან ერთად დევს, შენ უკვე იცი, რომ ის ყავასავით არომატული იქნება. ჰეილიმ მოახერხა ის, რაც ბევრს არ გამოსდის — მან პროდუქტის გემო და სუნი ფოტოდან გვაგრძნობინა.

4. ტელეფონის ჩასადები ტუჩსაცხისთვის

აღიარე, რამდენჯერ გინახავს ინსტაგრამზე სარკეში გადაღებული ფოტო, რომელშიც გოგოებს ტელეფონის ჩასადებზე Rhode-ის ტუჩსაცხი აქვთ მიმაგრებული? ეს ალბათ ჰეილის ყველაზე ხმაურიანი იდეა იყო. მან უბრალოდ კი არ შექმნა მოსახერხებელი ქეისი, არამედ მთელი მსოფლიო აიძულა, რომ მისი პროდუქტისთვის უფასო რეკლამა გაეკეთებინათ.

ეს ნივთი წამებში ყველასათვის სასურველი აქსესუარი გახდა — პრაქტიკულიცაა, რადგან ტუჩსაცხის ძებნა ჩანთაში აღარ გიწევს და თან საოცრად ფოტოგენურია.

5. მარგალიტისფერი ფრჩხილები

მოდი, ვაღიაროთ, რომ მსოფლიოში არ დარჩენილა გელ-ლაქის სპეციალისტი, რომელსაც მომხმარებელმა ტელეფონი სახესთან არ მიუტანა და ჰეილის ფრჩხილების ფოტო არ აჩვენა. ჰეილიმ მოახერხა და 90-იანების მივიწყებული მარგალიტისფერი ბზინვარება ისეთ ტრენდად აქცია, რომ სალონებში ამ კონკრეტული ფხვნილის დეფიციტი შეიქმნა.

ჰეილის მხოლოდ ერთი პოსტი გახდა საკმარისი იმისთვის, რომ მთელს ინდუსტრიას მიმართულება შეეცვალა. დღესაც კი, როცა არ იცი, რა ფერის გელ-ლაქი გინდა, მარგალიტის ეფექტი ყველაზე უსაფრთხო და მოდური არჩევანია. ჰეილიმ უბრალოდ იცის, როგორ აქციოს სიმარტივე ისეთ რამედ, რაც ყველას მოუნდება.

6. სუში და სახის ნიღაბი

თუ ფიქრობდი, რომ სახის ნიღბის წასმა მხოლოდ აბაზანაში ჩაკეტვასა და უძრავად ყოფნას ნიშნავდა, ჰეილი ბიბერმა საწინააღმდეგო დაამტკიცა. ინტერნეტში ვირუსულად გავრცელდა მისი ვიდეო, რომელშიც სახეზე Rhode-ის ნიღაბი უკეთია და თან სუშის გემრიელად მიირთმევს. ერთი შეხედვით, ეს ჩვეულებრივი ვიდეოა, მაგრამ ამავდროულად ძალიან ჭკვიანურიც.

სინამდვილეში, ამით ჰეილიმ პირდაპირ დაგვანახა, რომ მისი ნიღაბი კანზე იდეალურად ფიქსირდება და არ სრიალებს. ხშირად სახის ნიღბის გაკეთება ნიშნავს, რომ 15-20 წუთი უძრავად უნდა იწვე, რათა არ ჩამოგივარდეს. ვიდეოში კი კარგად ჩანს, რომ ჰეილის პროდუქტით შეგიძლია საქმე ჩვეულებრივად გააგრძელო, ისადილო და დრო არ დაკარგო. ნამდვილი თავის მოვლის რუტინაც სწორედ ასეთი უნდა იყოს — პრაქტიკული და ესთეტიკური.

7. კბილებიანი სავარცხელი სახის კრემისთვის

თუ გეგონა, რომ სავარცხელი მხოლოდ თმისთვისაა, ჰეილი ბიბერმა კიდევ ერთი მოულოდნელი ტრენდი შემოგვთავაზა. სოციალურ ქსელებში ძალიან სწრაფად გავრცელდა კადრები, რომლებშიც ის Rhode-ის სახის კრემს ჩვეულებრივი კბილებიანი სავარცხლით ინაწილებს.

სავარცხლის კბილების საშუალებით კრემი სახეზე თანაბრად ნაწილდება. გარდა ამისა, ეს პროცესი ერთგვარ მსუბუქ მასაჟსაც წააგავს, რაც კანში სისხლის მიმოქცევას აუმჯობესებს. ჰეილიმ კიდევ ერთხელ დაგვანახა, რომ სახის კანის მოვლის ყოველდღიურ რუტინაში კრეატიულობის ადგილი ყოველთვის მოიძებნება. ჰეილის სამყაროში ნებისმიერი საყოფაცხოვრებო ნივთი სილამაზის ინსტრუმენტად შეიძლება იქცეს, რა თქმა უნდა, თუ მას სწორად გამოიყენებ.