საქართველოს ახალგაზრდა იურისტთა ასოციაციამ (საია) თბილისის საქალაქო სასამართლოს მოსამართლე თამარ მახარობლიძეს ოფიციალური განცხადებით მიმართა. ორგანიზაცია მიხეილ სააკაშვილის, გიორგი ვაშაძის, ნიკა გვარამიას, ელენე ხოშტარიასა და სხვა ოპოზიციონერი ლიდერების წინააღმდეგ მიმდინარე სისხლის სამართლის საქმის სხდომებზე, რომლებიც მოსამართლემ სრულად დახურა, დაშვებას ითხოვს.

საია წერს, რომ მოსამართლემ, წესრიგის დაცვის მოტივით, სხდომები სრულად დახურა, რითაც მედიასა და საზედამხედველო ორგანიზაციებს დასწრების შესაძლებლობა წაართვა. საია მიუთითებს, რომ საჯაროობის შეზღუდვა უკიდურესი ღონისძიებაა და მოსამართლეს წესრიგის დასაცავად ინდივიდუალური მექანიზმების (მაგ. გაფრთხილება, გაძევება) გამოყენება შეეძლო.

როგორც ორგანიზაცია წერს, მოსამართლე მახარობლიძემ საიას მიმართვა სხდომაზე არც კი გააჟღერა, რითაც მხარეთა ინფორმირებულობის პრინციპი დაარღვია და შეზღუდა მათი ეფექტიანი მონაწილეობა პროცესში.

ვინაიდან ბრალდებულები ოპოზიციური პარტიების ლიდერები არიან, საია აღნიშნავს, რომ ამ საქმეებს გავლენა აქვს პოლიტიკურ გარემოსა და დემოკრატიულ ინსტიტუტებზე, ამიტომ პროცესის გამჭვირვალობა კრიტიკულად მნიშვნელოვანია. ბრალდებულთა უმეტესობას ადრე უკვე ჰქონდა წარდგენილი ბრალი სხვა საქმეზე, რაც საიას თქმით, პოლიტიკურად აქტიური პირების მიმართ მიზანმიმართული დევნის პრაქტიკის შესახებ აჩენს ეჭვს.

საიას განცხადებით, მოსამართლის ქმედება არ არის თანაზომიერი და აკლია ლეგიტიმური მიზანი. მათივე ცნობით, არსებობს საფუძვლიანი ეჭვი, რომ საჯაროობის შეზღუდვით სასამართლომ თავიდან აირიდა საზოგადოებრივი კონტროლი საქმის ფაქტობრივ გარემოებებსა და მიღებულ გადაწყვეტილებებზე. საია წერს იმასაც, რომ პროცესების გაუმჭვირვალობა კიდევ უფრო ამცირებს მართლმსაჯულების სისტემის მიმართ ისედაც შელახულ ნდობას.

საიას სტატია სრულად იხილეთ აქ.