პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის, მარიამ ლაშხის განცხადებით, პირველი ლედის, თამარ ბაგრატიონის სიტყვით გამოსვლას ვაშინგტონში მელანია ტრამპის ადმინისტრაციის მხრიდან დადებითი გამოხმაურება მოჰყვა. მისი თქმით, ტრამპის ადმინისტრაციის სპეციალურმა წარმომადგენელმა კომპლიმენტებით აავსო პირველი ლედი.

"საქართველოს პირველ ლედის ჰქონდა შესაძლებლობა რამდენიმე ქვეყანასთან ერთად, წარმოეთქვა სიტყვა და ქართველი ხალხის ხმა გაევრცელებინა სახელმწიფო დეპარტამენტში. გაეჟღერებინა ის ძირითადი მიმართულებები და პრინციპები, რასაც საქართველო ემსახურება, როგორც ბავშვის ინტერესების დაცვის კუთხით, ასევე ციფრული გამოწვევების ფონზე, ჩვენი ეკონომიკურ-ტექნოლოგიური განვითარების კუთხით.

მნიშვნელოვანი იყო ის გამოხმაურებები, რაც ჩვენ პირველ ლედის გამოსვლის შემდეგ ჰქონდა. ტრამპის ადმინისტრაციის სპეციალურმა წარმომადგენელმა კომპლიმენტებით აავსო პირველი ლედი და თქვა, რომ ერთ-ერთი ყველაზე დამამახსოვრებელი ნაწილი მის გამოსვლაში იყო ის, რომ დედური ინსტინქტის ტრანსფორმაცია ხდება გლობალურ მოძრაობასა და გაერთიანებაში", — განაცხადა მარიამ ლაშხმა. კომენტარს სამთავრობო ტელეკომპანია "რუსთავი 2" ავრცელებს.

დღეს, ვაშინგტონში მიმდინარე სამიტის ფარგლებში, მელანია ტრამპი პრეზიდენტების მეუღლეებს თეთრ სახლში მრგვალი მაგიდის ფორმატში უმასპინძლებს. გუშინ, 24 მარტს მან მონაწილეობა მიიღო გლობალური სამიტის, "ერთად უკეთესი მომავლისთვის" სამუშაო სესიაში, სადაც შეკრებილებს სიტყვით მიმართა.

თამარ ბაგრატიონმა აშშ-ის პირველ ლედის მასპინძლობისთვის მადლობა გადაუხადა და აღნიშნა, რომ მელანია ტრამპმა შეძლო დედობრივი ინსტინქტი გლობალურ მოძრაობად ექცია.

"მე წარმოვადგენ ერს, რომლის ისტორია სამ ათასწლეულზე მეტს ითვლის. საქართველოს საუკუნეების წინად მართავდა თამარ მეფე - პირველი ქალი მონარქი, რომელიც მეფედ იწოდებოდა. მას მტკიცედ სწამდა, რომ მმართველის სიდიადე იმით იზომება, თუ როგორ იცავს იგი მათ, ვინც ყველაზე მეტად საჭიროებს მფარველობას. ჩემთვის, როგორც პირველი ლედისთვის, მისი სახელის ტარება და ბაგრატიონთა სამეფო დინასტიის მემკვიდრეობის წარმომადგენლობა ერთდროულად უდიდესი პრივილეგია და პასუხისმგებლობაა.

დღეს ჩვენ ერთი საერთო პასუხისმგებლობა გვაერთიანებს — ჩვენი შვილების კეთილდღეობა და მათი მომავალი. როგორც პირველი ლედი, მე მთელი გულით ვემსახურები ამ მისიას და უპირველეს ყოვლისა, მოგმართავთ როგორც ოთხი შვილის დედა, ადამიანი, რომელსაც კარგად ესმის და განიცდის ბავშვის კეთილდღეობაზე ზრუნვის უწყვეტ პასუხისმგებლობას.

ყველა მშობლისთვის ნაცნობია ის ჩუმი დაძაბულობა, რომელსაც გულით ვატარებთ: სურვილი, დავიცვათ ჩვენი შვილები საფრთხისგან. ამავდროულად, მივცეთ მათ თავისუფლება — გაიზარდონ, შეიმეცნონ და ისარგებლონ სწრაფად განვითარებადი ეპოქის შესაძლებლობებით. ამ ბალანსის პოვნა მარტივი არ არის, ეს ყოველდღიური გამოწვევაა. ჩუმი, უხილავი, თუმცა ძალზე რეალური საზრუნავი, რომელსაც იზიარებს ყველა ოჯახი მთელ მსოფლიოში", — განაცხადა თამარ ბაგრატიონმა.

• მიხეილ ყაველაშვილის თქმით, მისი მეუღლე თამარ ბაგრატიონი, მელანია ტრამპის მიწვევით, გლობალურ სამიტში მიიღებს მონაწილეობას