ცოტა ხნის წინ დადასტურა, რომ მენდი პატინკინი Amazon Prime Video-ის სერიალ God of War-ის ეკრანიზაციას შეუერთდა. ის ოდინის "ყველაზე ძლიერი ასგარდელი ღმერთის" როლს მოირგებს.

პერსონაჟის აღწერის მიხედვით: "ოდინი, ყოვლადმამა, ფიზიკურად შთამბეჭდავი ან განსაკუთრებულად ღმერთისმაგვარი არ არის, თუმცა გარეგნობამ არ უნდა მოგატყუოთ. ის პატრიარქია, რომელიც რკინის ხელით მართავს და ცოდნის შეუდარებელი მაძიებელია. წინასწარმეტყველების ძიებისას ოდინი პარანოიდული, მანიპულაციური და სახიფათოა, ის ყველაფერზე წავა, რათა რაგნარიოკი, სკანდინავიური სამყაროს დასასრული, აიცილოს. ის კრატოსის ძლიერ ანტაგონისტად გვევლინება".

PlayStation-ის პოპულარულ ვიდეოთამაშზე დაფუძნებული God of War მამა-შვილის, კრატოსისა და მისი ათი წლის შვილის, ატრეუსის მოგზაურობაზე მოგვითხრობს, რომლებსაც სურთ ცოლისა და დედის, ფეის, ფერფლი მიმოაბნიონ. ამ თავგადასავლების გზაზე კრატოსი ცდილობს შვილს უკეთესი ღმერთობა ასწავლოს, მაშინ როცა ატრეუსი მამას უკეთეს ადამიანად ყოფნას ასწავლის.

რაიან ჰერსტი კრატოსის როლში

ფოტო: Getty Images / Playstation

პატინკინი შეუერთდა უკვე გამოცხადებულ მსახიობებს: რაიან ჰერსტს (კრატოსი), მაქს პარკერს (ჰეიმდალი), ტერეზა პალმერს (სიფი) და ოლაფურ დარი ოლაფსონს (თორი). ის ყველაზე მეტად ცნობილია როლებით ფილმებში და სერიალებში: The Princess Bride, Homeland და Chicago Hope.

ოლაფურ დარი ოლაფსონი Apple TV-ს სერიალში Severance

ფოტო: Apple TV+

Amazon-მა სერიალის ორი სეზონი დაამტკიცა, ხოლო ვანქუვერში უკვე დაწყებულია წარმოების წინა ეტაპი. სერიალის სცენარისტი, აღმასრულებელი პროდიუსერი და შოურანერია რონალდ დ. მური (Outlander, For All Mankind), პირველ ორ ეპიზოდს კი ფრედერიკ ე.ო. ტოიე (Shōgun, The Boys, Fallout) გადაიღებს.

სერიალს ერთობლივად აწარმოებენ Sony Pictures Television და Amazon MGM Studios, PlayStation Productions-სა და Tall Ship Productions-თან თანამშრომლობით.

სერიალის გამოსვლის თარიღი ჯერჯერობით უცნობია, თუმცა პრემიერა სავარაუდოდ 2027 წლის ბოლოს, ან 2028 წლის დასაწყისში შედგება.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…