"აბუ-დაბის მდგრადი განვითარების კვირეულის (ADSW) სამიტის ფარგლებში შევხვდი არაბთა გაერთიანებული საამიროების საგარეო საქმეთა სახელმწიფო მინისტრს, საედ ბინ მუბარაქ ალ ჰაჯერის" — წერს სოციალურ ქსელში "ოცნების" ხელისუფლების საგარეო საქმეთა მინისტრი მაკა ბოჭორიშვილი.

ის "ოცნების" პრემიერ ირაკლი კობახიძესთან ერთად აბუ-დაბიში იმყოფება, სადაც მდგრადი განვითარების კვირეულის (ADSW) სამიტში მიიღებს მონაწილეობას.

"განვიხილეთ ორ ქვეყანას შორის ურთიერთობების პოზიტიური დინამიკა, სხვადასხვა სფეროებში თანამშრომლობის პერსპექტივები და მიმდინარე საინვესტიციო პროექტები საქართველოში", — წერს სოციალურ ქსელში მაკა ბოჭორიშვილი.

საგარეო უწყების ცნობით, "შეხვედრისას მინისტრებმა ხაზი გაუსვეს საქართველოსა და არაბთა გაერთიანებულ საამიროებს შორის არსებულ მეგობრულ და პარტნიორულ კავშირებს. საუბარი, ასევე შეეხო ინვესტიციების სფეროში თანამშრომლობას, ქვეყნებს შორის სავაჭრო-ეკონომიკური კავშირების გაღრმავებასა და შუა დერეფნის მნიშვნელობას.

დადებითად შეფასდა მაღალი დონის ვიზიტების გაცვლის დინამიკა, მათ შორის განსაკუთრებით აღინიშნა არაბთა გაერთიანებული საამიროების პრეზიდენტის, შეიხ მოჰამედ ბინ ზაიედ ალ ნაჰიანის ვიზიტი საქართველოში.

განსახილველ საკითხებს შორის იყო რეგიონსა და მსოფლიოში არსებული უსაფრთხოების გარემო და გამოწვევები. მინისტრებმა ხაზგასმით აღნიშნეს ერთობლივი ძალისხმევის მნიშვნელობა ამ მიმართულებით.

მხარეებმა, კიდევ ერთხელ დაადასტურეს მზადყოფნა ორ ქვეყანას შორის ნაყოფიერი თანამშრომლობის გაგრძელებასა და კიდევ უფრო გააქტიურებასთან დაკავშირებით", — წერია გავრცელებულ ინფორმაციაში.