სასამართლომ 16 წლის მოზარდის ცემისთვის მკლავჭიდელ ხატია ვიბლიანს 1 წლითა და 6 თვით პირობითი სასჯელი შეუფარდა.

უფლებადამცველის განცხადებით, ხატია ვიბლიანი უხეშად და აგრესიულად სთხოვდა მოლარეს მას ურიგოდ მომსახურებოდა. დაზარალებულმა არასრულწლოვანმა "სიტუაციის განმუხტვის მიზნით" ვიბლიანს მოუწოდა, რომ შეეწყვიტა მოლარისთვის შეურაცხყოფის მიყენება. უფლებადამცველი ხაზს უსვამს, რომ არასრულწლოვანს მკლავჭიდელისთვის სიტყვიერი შეურაცხყოფა არ მიუყენებია.

ვიბლიანს ბრალი 126-ე მუხლის პირველი პრიმა ნაწილის "ა" ქვეპუნქტით წარედგინა. 17 სექტემბერს სასამართლომ მკლავჭიდელს 3 000-ლარიანი გირაო შეუფარდა.

პირობითი სასჯელის პირობებში ვიბლიანს ეკრძალება საცხოვრებელი ადგილის შეცვლა და ქცევის კორექციის კურსი უნდა გაიაროს. ბრალდებულმა პროცესზე დანაშაული აღიარა და დაზარალებულის ოჯახს ბოდიში მოუხადა.

"ვინანიებ სრულიად დანაშაულს, გაცნობიერებული მაქვს. ვაღიარებ, დიდი სინანულიც გამაჩნია, აბსოლუტურად ვიაზრებ დაზარალებულის, მისი ოჯახის მდგომარეობას, მშობლების მდგომარეობას, გამომდინარე იქიდან, რომ მეც მშობელი ვარ, ორი შვილი მყავს და ცხოვრებაში პირველად შემემთხვა ასეთი სამწუხარო ფაქტი. ბოდიშს ვიხდი დაზარალებულის წინაშე," — განაცხადა ვიბლიანმა სასამართლო პროცესზე". (წყარო რადიო თავისუფლება)

მიუხედავად იმისა, რომ პროკურორი ნათია ნოზაძე ხატია ვიბლიანისთვის საპატიმრო სასჯელს ითხოვდა, სასამართლომ გაითვალისწინა ბრალდებულის მცირეწლოვანი შვილები.