2025 წლის ნოემბრის ბოლოს და დეკემბრის დასაწყისში კიევის სოციოლოგიის საერთაშორისო ინსტიტუტის (KIIS) მიერ ჩატარებული კვლევის მიხედვით, უკრაინელების 60%-ზე მეტი უკრაინის მოქმედ პრეზიდენტ ვოლოდიმირ ზელენსკის ენდობა.

უკრაინული მედიის ცნობით, KIIS-ის კვლევა 26 ნოემბრიდან 13 დეკემბრის ჩათვლით ჩატარდა. სოციოლოგები აღნიშნავენ, რომ ოქტომბრის დასაწყისში ნდობის მაჩვენებლები თითქმის იდენტური იყო.

"ამავდროულად, პრეზიდენტის მიმართ ნდობის მაჩვენებლები დინამიკურია. ნოემბერში (26-30 ნოემბერი) გამოკითხულ რესპონდენტებს შორის 49% ენდობოდა ზელენსკის, ხოლო დეკემბერში (1-13 დეკემბერი) გამოკითხულ რესპონდენტებს შორის ეს მაჩვენებელი 63% იყო (და 65% 8-13 დეკემბრის კვირაში)", — წერია კვლევაში.

შემთხვევითობის პრინციპით შერჩეულ რესპონდენტებთან გამოკითხვა ტელეფონით ჩატარდა და
18 წლის და უფროსი ასაკის 547 რესპონდენტი გამოიკითხა უკრაინის ყველა რეგიონში.

"უკრაინსკაია პრავდა" წერს, რომ ფორმალურად, ამ ტიპის გამოკითხვაში ცდომილება არ აღემატებოდა 5.6%-ს 50%-თან ახლოს მყოფი მაჩვენებლებისთვის, 4.8%-ს 25%-თან ახლოს მყოფი მაჩვენებლებისთვის, 3.4%-ს 10%-თან ახლოს მყოფი მაჩვენებლებისთვის და 2.5%-ს 5%-თან ახლოს მყოფი მაჩვენებლებისთვის.

შეგახსენებთ, რომ აშშ-ის პრეზიდენტი დონალდ ტრამპი მიიჩნევს, რომ უკრაინაში საპრეზიდენტო არჩევნების ჩატარების "დრო დადგა". ზელენსკიმ ამ კრიტიკას უპასუხა და განაცხადა, რომ ამისთვის "ყოველთვის მზადაა". მისივე თქმით, საერთაშორისო პარტნიორებმა არჩევნების დროს უსაფრთხოება უნდა უზრუნველყონ. თავად ზელენსკი ღიაა საომარი მდგომარეობის დროს საარჩევნო კანონმდებლობაში ცვლილებებისთვის.