საქართველოს ანტიკორუფციული ბიუროს გაუქმების შესახებ გავრცელებული ცნობები მას შემდეგ გაჩნდა, რაც უწყებამ მისი ხელმძღვანელის გადადგომის შესახებ გავრცელებული ინფორმაცია უარყო.

სამშაბათს, 11 ნოემბერს, ოპოზიციურად განწყობილმა ტელეკომპანია ფორმულამ გაავრცელა ინფორმაცია, ბიუროს ხელმძღვანელის, რაჟდენ კუპრაშვილის თანამდებობიდან გადაყენების შესახებ. ტელეკომპანიამ აღნიშნა, რომ ეს ცნობა უწყების თანამშრომლებზე დაყრდნობით გაავრცელეს, რომლებიც შეხვედრას დაესწრნენ, სადაც კუპრაშვილის გათავისუფლების შესახებ გაკეთდა განცხადება.

"კუპრაშვილი უკვე რამდენიმე დღეა საჯაროდ არ გამოჩენილა", — აღნიშნა ფორმულამ. "მისი ბოლო განცხადება მედიაში ყოფილი პრემიერმინისტრის, ირაკლი ღარიბაშვილის წინააღმდეგ დაწყებულ გამოძიებას ეხებოდა".

ფორმულას სიუჟეტის გავრცელების შემდეგ, მალევე, OC Media-მ კომენტარისთვის ანტიკორუფციულ ბიუროს მიმართა. უწყების სპიკერმა განაცხადა, რომ კუპრაშვილის გადადგომის შესახებ ინფორმაცია სიცრუეა.

ოთხშაბათს, 12 ნოემბერს, პარლამენტის თავმჯდომარე, შალვა პაპუაშვილი, ასევე გამოეხმაურა გავრცელებულ ამბებს და აღნიშნა, რომ კუპრაშვილის გადაყენების საფუძველს ვერ ხედავს.

"არა, რატომ უნდა მქონდეს? საერთოდ, არც დანიშვნა და არც გათავისუფლება ამ ინსტიტუციაში ჩემს კომპეტენციაში არ შედის", — განაცხადა პაპუაშვილმა IPN-ის თანახმად.

პაპუაშვილმა ასევე აღნიშნა, რომ ბიუროს მთავარი გამოწვევა მისი სახელწოდებაა.

"გესმის სახელი "ანტიკორუფციული ბიურო" და გგონია, რომ ეს არის საგამოძიებო უწყება, რომელიც უშუალოდ ებრძვის კორუფციას. ასე არ არის. ეს მცდარი ნარატივია, რომლის ჩამოყალიბებასაც ბიუროს სახელწოდებიდან გამომდინარე ცდილობთ", — განაცხადა მან.

პრორუსული მედიასაშუალება იმედის ცნობით, პაპუაშვილმა ისიც დაამატა, რომ ბიუროს ფუნქციები დროთა განმავლობაში ნელ-ნელა გაიზარდა.

"თავდაპირველი ფუნქციისგან, რომელიც იყო საჯარო მოხელეების დეკლარაციების შევსების უზრუნველყოფა, დაემატა სტრატეგიის შემუშავება, დაემატა შემდეგ უცხოური დაფინანსების კონტროლი და ა.შ. რაც რა თქმა უნდა გამოწვევებს წარმოადგენს თუმცა ის, როგორც ბიურო საქმიანობს ვფიქრობ, რომ არის დამაკმაყოფილებელი", — თქვა კუპრაშვილმა.

მოგვიანებით, სამშაბათ საღამოს, კომერსანტმა წყაროებზე დაყრდნობით გაავრცელა ინფორმაცია, რომ პარლამენტი — სრულად ქართული ოცნების კონტროლქვეშ — ამზადებს "საკანონმდებლო ინიციატივას", რომლის მიხედვითაც ანტიკორუფციული ბიურო გაუქმდება და მისი ფუნქციები სახელმწიფო უსაფრთხოების სამსახურს (სუს) და აუდიტის სამსახურს გადაეცემა.

ოთხშაბათს კუპრაშვილმა ჟურნალისტებს განუცხადა, რომ არსად მიდის და თანამდებობას ინარჩუნებს.

"ვრჩები სამსახურში. მადლობა ემოციისა და ინტერესისთვის. როგორც ხედავთ, მოვედი სამსახურში და გავაგრძელებ მუშაობას. სანამ ეს უწყება იარსებებს, მე ვიქნები მისი ხელმძღვანელი", — განუცხადა მან ჟურნალისტებს BM.ge-ს თანახმად.

ანტიკორუფციული ბიურო და მისი ხელმძღვანელი, რაჟდენ კუპრაშვილი, მნიშვნელოვანი ფიგურები არიან საქართველოს მთავრობის მიერ სამოქალაქო საზოგადოების და დამოუკიდებელი მედიის მიმართ განხორციელებულ ზეწოლაში.

ორშაბათს, 10 ნოემბერს, დამოუკიდებელმა მედიასაშუალება ინდიგომ გაავრცელა ინფორმაცია, რომ ბიურომ მის წინააღმდეგ დაიწყო გამოძიება გრანტების შესახებ კანონის მიხედვით — კანონი, რომელიც, მთავრობის წინასწარი თანხმობის გარეშე, ორგანიზაციებს დონორული დაფინანსების მიღებას უკრძალავს.

ინდიგო გახდა ყველაზე ბოლო მედია ან სამოქალაქო ორგანიზაციაა, რომელიც ბიუროს მიერ შემოწმებას დაექვემდებარა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.