"ოცნების" პრემიერმინისტრის, ირაკლი კობახიძის 11 ნოემბრით დათარიღებული გადაწყვეტილებით, ლერი ბარნაბიშვილი ფინანსთა მინისტრის მოადგილის თანამდებობიდან გათავისუფლდა.

"საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის 24-ე მუხლის პირველი პუნქტის საფუძველზე, გათავისუფლდეს ლერი ბარნაბიშვილი საქართველოს ფინანსთა მინისტრის მოადგილის თანამდებობიდან 2025 წლის 11 ნოემბრიდან", — წერია ირაკლი კობახიძის ხელმოწერილ განკარგულებაში.

უწყებაში აცხადებენ, რომ ბარნაბიშვილმა თანამდებობა "პირადი განცხადების საფუძველზე" დატოვა.

ლერი ბარნაბიშვილი ორჯერ იყო ფინანსთა მინისტრის მოადგილე: პირველად — 2015-2020 წლებში, მეორედ ამ პოსტზე 2024 წლის 5 მარტს დაინიშნა.

"ნეტგაზეთის" ცნობით, 2013 წლის ნოემბერში ის ფინანსთა სამინისტროს საგამოძიებო სამსახურის უფროსის მოადგილედ მაშინდელმა პრემიერმინისტრმა, ირაკლი ღარიბაშვილმა ფინანსთა მინისტრ ნოდარ ხადურის წარდგინებით დანიშნა. 2013-2015 წლებში კი ფინანსთა სამინისტროს საგამოძიებო სამსახურის უფროსი თანამდებობას იკავებდა.

2021-2024 წლებში ბარნაბიშვილი საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი იყო; 2020-2021 წლებში — ლევან სამხარაულის სახელობის სასამართლო ექსპერტიზის ეროვნული ბიუროს უფროსი.