სომხეთის მთავრობისა და სომხეთის სამოციქულო ეკლესიას შორის მზარდი დაპირისპირების ფონზე, ხელისუფლებამ კათალიკოს გარეგინ მეორის ძმა და ძმისშვილი დააკავა — მათ ბრალად ედებათ მოქალაქეთა იძულება საარჩევნო კამპანიაში მონაწილეობისთვის ან კამპანიის ხელის შეშლა.

დაკავებები ვაღარშაპატში მომხდარ ინციდენტს უკავშირდება, სადაც ოპოზიციურმა აქტივისტებმა განაცხადეს, რომ ნერსისიანი წინასაარჩევნო კამპანიაში ჩაერია. სომხეთის რესპუბლიკური პარტიის კანდიდატმა განაცხადა, რომ ნერსისიანმა და მისმა შვილმა მისი საარჩევნო საქმიანობისთვის "ხელის შეშლა" სცადეს. ოჯახის ადვოკატის თქმით, ეს ბრალდებები უსაფუძვლოა და ჩარევა არ მომხდარა.

ოქტომბერში, სომხეთის უსაფრთხოების სამსახურებმა ეკლესიის რამდენიმე ეპარქია გაჩხრიკეს და ათზე მეტი სასულიერო პირი დააკავეს, მათ შორის — ეპისკოპოსი მკრტიჩ პროშიანი, რომელიც კათალიკოსის ბიძაშვილია. დაკავებულებს არეულობის წახალისება ედებათ ბრალად. ეკლესიამ მაშინაც დაგმო ეს ნაბიჯი და ეკლესიაზე სახელმწიფოს ზეწოლად შეაფასა.

2024 წლის შუა პერიოდიდან დაპირისპირება კიდევ უფრო გამწვავდა და მაღალი რანგის სასულიერო პირებსა და ოპოზიციის ლიდერებიც მოიცვა. 2025 წლის ივნისში, მთავრობამ დააკავა არქიეპისკოპოსი ბაგრატ გალსტანიანი და სხვა ეკლესიასთან დაკავშირებული პირები — მათ ხელისუფლების დამხობის მცდელობა ედებათ ბრალად.

ეკლესიის განცხადებით, პრემიერმინისტრი ნიკოლ ფაშინიანი სახელმწიფო უწყებებს ეკლესიის დამოუკიდებლობის შესაზღუდად და მის დისკრედიტაციისთვის იყენებს. ფაშინიანი კი, ეკლესიას პოლიტიკაში ჩარევასა და ოპოზიციასთან ალიანსში ადანაშაულებს, რაც მისი განცხადებით, ქვეყნის სტაბილურობას საფრთხეს უქმნის.

იურიდიული თვალსაზრისით, საარჩევნო კამპანიის იძულების ან ხელის შეშლის შესახებ მუხლი 211 იშვიათად გამოიყენება, ამიტომ მისი გამოყენება ასეთ მაღალპროფილურ საქმეში შესაძლოა პრეცედენტი გახდეს მომავალ პოლიტიკურ-იურიდიულ დაპირისპირებებში. საგამოძიებო კომიტეტის განცხადებით, საქმე აქტიურ ფაზაშია და ორივე მამაკაცი გამოძიების მიმდინარეობის პერიოდში დააკავეს.

ეკლესიამ განცხადება გაავრცელა, სადაც ამ ნაბიჯს "უსამართლოდ" აფასებს და დასძინა, რომ ეს შემთხვევა სერიოზულ გავლენას მოახდენს სამოქალაქო საზოგადოებაზე და რელიგიის თავისუფლებაზე.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.