5 ევროპარლამენტარი 4 ოქტომბრის თვითმმართველობის არჩევნებზე ერთობლივ განცხადებას ავრცელებს, სადაც ნათქვამია, რომ "2025 წლის 4 ოქტომბრის საქართველოს ადგილობრივი არჩევნები ჩატარდა შემზღუდველ გარემოში, თვითგამოცხადებული "ქართული ოცნების" ხელისუფლების მიერ სამოქალაქო საზოგადოების, დამოუკიდებელი მედიისა და პოლიტიკური ოპოზიციის რამდენიმეთვიანი რეპრესიების ფონზე".

ევროპარლამენტარები მწუხარებას გამოთქვამენ იმის გამო, რომ "ხელისუფლებამ ეფექტურად შეუშალა ხელი სანდო არჩევნების დამკვირვებლების ყოფნას, ეუთოს/დემოკრატიული ინსტიტუტებისა და ადამიანის უფლებათა ოფისის (OSCE/ODIHR) დაგვიანებული მოწვევით და სამოქალაქო საზოგადოების შეზღუდვებით, რაც ხელს უშლიდა ადგილობრივი ორგანიზაციების მიერ არჩევნებზე დაკვირვებას".

"ჩვენ შეშფოთებულები ვართ არჩევნების შემდეგ ქუჩებში ძალადობრივი შეტაკებებით და მოვუწოდებთ ყველას სიმშვიდისკენ. ჩვენ მოვუწოდებთ „ქართულ ოცნებას“, შეწყვიტოს დემოკრატიაზე თავდასხმა და პატივი სცეს შეკრებისა და გამოხატვის თავისუფლების ფუნდამენტურ უფლებებს, შეწყვიტოს მომიტინგეების დაპატიმრებები და

გაათავისუფლოს თვითნებურად დაკავებული პირები. ჩვენ ასევე ვწუხვართ ევროკავშირის წინააღმდეგ სულ უფრო აგრესიულ კამპანიას, მათ შორის პირად თავდასხმებს ევროკავშირისა და წევრი ქვეყნების ელჩებზე, ევროპელ პოლიტიკოსებსა და ცალკეულ წევრ სახელმწიფოებზე.

ჩვენ მკაცრად ვგმობთ ქართული ოცნების მიერ ოპოზიციური პარტიების აკრძალვის გამოცხადებულ განზრახვას,

რაც საქართველოს ავტორიტარული რეჟიმისკენ სრიალის ახალ კულმინაციას წარმოადგენს. ჩვენ კვლავ ვუცხადებთ ჩვენს მოწოდებას ევროკავშირისა და მისი წევრი სახელმწიფოების მიმართ, დაუყოვნებლივ მიიღონ ზომები და დააწესონ პერსონალური სანქციები „ქართული ოცნების“ ძირითადი პოლიტიკური ლიდერებისა და თანამდებობის პირების მიმართ, რომლებიც პასუხისმგებელნი არიან დემოკრატიული უკუქცევის, არჩევნების გაყალბების, ადამიანის უფლებების დარღვევების და პოლიტიკური ოპონენტებისა და აქტივისტების, კერძოდ, ბიძინა ივანიშვილისა და ირაკლი კობახიძის დევნაზე", — ნათქვამია განცხადებაში, რომელსაც ხელს აწერენ:

საგარეო საქმეთა კომიტეტის (AFET) ევროპარლამენტარი დევიდ მაკალისტერი,

ადამიანის უფლებათა ქვეკომიტეტის თავმჯდომარე, ევროპარლამენტარი მუნირ სატური,

ევრონესტის საპარლამენტო ასამბლეის დელეგაციის თავმჯდომარე სერგეი ლაგოდინსკი,

სამხრეთ კავკასიასთან ურთიერთობების დელეგაციის თავმჯდომარე, ევროპარლამენტარი, ნილს უშაკოვსი,

AFET-ის საქართველოს საკითხებში მუდმივმოქმედ მომხსენებლის, ევროპარლამენტარის, რასა იუკნევიჩიენე.