"სამწუხაროდ, ოპოზიცია ცდილობს წარმოაჩინოს, რომ ეს არის ერთი პარტიის დოკუმენტი, რაც სავსებით არ არის ასე", - ასე შეაფასა საქართველოს პრემიერ-მინისტრმა, გიორგი კვირიკაშვილმა დღეს, 26 სექტემბერს საქართველოს კონსტიტუციის მიღების პროცესი.

მისი თქმით, განხილვების პროცესში მონაწილეობდნენ პარტიები, ექსპერტები, არასამთავრობო ორგანიზაციები, და პროცესი იყო უპრეცედენტო. მანვე აღნიშნა, რომ ვენეციის კომისიამ კონსტიტუციის პროექტი შეაფასა როგორც საქართველოს დემოკრატიული განვითარების თვალსაზრისით წინ გადადგმული ნაბიჯი, რომელიც აბალანსებს ძალაუფლებას ქვეყანაში - ეფუძნება ძლიერ პარლამენტს, ქმედით მთავრობას, დამო-უკიდებელ სასამართლოსა და ზეპარტიულ პრეზიდენტს.

"დოკუმენტი, რომელიც ჩვენ მივიღეთ არის ვენეციის კომისიის მიერ შეფასებული როგორც სიტყვა სიტყვით მინდა ვთქვა: "დოკუმენტი, რომელიც ეფუძნება დემოკრატიის სამართლებრივი სახელმწიფოს და ძირითადი უფლებების დაცვის პრინციპებს."

კვირიკაშვილის თქმით, კონსენსუსი მიღწევის მიზნით, მმართველი გუნდი დათმობებზეც წავიდა და პრეზიდენტის არჩევის წესი და პროპორციულ სისტემაზე გადასვლა ერთდროულად, 2024 წლიდან მოხდება, რაც წლების განმავლობაში ოპოზიციური პარტიებისთვის სანატრელი იყო. მისი შეფასებით, კონსტიტუციის პროექტი სრულად პასუხობს საზოგადოების მოთხოვნებს და ქვეყნის განვითარების დღის წესრიგს.