საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა უკანონოდ გასამართლებული 14 მსჯავრდებულის მიმართ, გამამტყუნებელი განაჩენის გადასინჯვის გადაწყვეტილება მიიღო.

პროკურატურის თქმით, საქმე ეხება 2006 წლის სექტემბერში "სამართლებრივი საფუძველის გარეშე" ჩატარებულ სპეცოპერაციას, რომელსაც პოლიტიკური პარტიების - XXI-ე საუკუნე - ენა, მამული, სარწმუნოების, სამართლიანობის, იმედისა და კონსტიტუციურ-მონარქისტული პარტიის - წევრების დაკავება მოჰყვა.

უწყების თქმით, აღნიშნულ საქმეზე ჩატარდა ხელახალი გამოძიება, რომლითაც მსჯავრდებულთა მიერ დანაშაულის ჩადენის ფაქტი გამოირიცხა:

"მსჯავრდებულთა გასამართლება მოხდა პოლიტიკური ანგარიშსწორების მიზნით. კერძოდ, 2005-2006 წლებში ხსენებული პოლიტიკური პარტიის ლიდერები საქართველოს სხვადასხვა რეგიონებში იმჟამინდელი ხელისუფლების წინააღმდეგ მართავდნენ პერმანენტულ საპროტესტო აქციებს, სადაც ისინი სანდრო გირგვლიანის, ზურაბ ვაზაგაშვილის და სხვა გახმაურებული საქმეების გამო ხელისუფლებას მწვავედ აკრიტიკებდნენ."

პროკურატურის განცხადებით, კუდის მაღალჩინოსნების სპეცოპერაციის ფარგლებში, კოალიცია სამართლიანობის წევრები შეიარაღებული ამბოხის მოწყობის ბრალდებით დააკავეს:

"ამ მიზნით, პოლიტიკური პარტია სამართლიანობის წევრი კახაბერ ქანთარია თითქოს საკუთარ საცხოვრებელ სახლში მართლსაწინააღმდეგოდ ინახავდა ცეცხლსასროლ იარაღსა და ასაფეთქებელ მოწყობილობას."

უწყების თქმით, ახალი გამოძიებითა და, მათ შორის კონსტიტუციური უსაფრთხოების დეპარტამენტის ყოფილი მაღალჩინოსნის ჩვენებით დადგინდა, რომ კახაბერ ქანთარიას საცხოვრებელი სახლის სარდაფიდან ამოღებული დიდი რაოდენობით ცეცხლსასროლი იარაღი და საბრძოლო მასალა სამართალდამცავებმა თავად მიიტანეს და დააწყვეს სარდაფში:

"მსჯავრდებულთა თითქოსდა საიდუმლო თათბირის შესახებ ყალბი ჩვენებები მისცეს კონსტიტუციური უსაფრთხოების დეპარტამენტის მიერ წინასწარ მოძიებულმა ცრუ მოწმეებმა, რომელთაც არანაირი შეხება ამ საქმესთან არ ჰქონდათ და მამხილებელი ჩვენებები, მხოლოდ სამართალდამცავების მუქარის, ზეწოლისა და მატერიალური დაპირებების შედეგად მისცეს."

პროკურატურის ინფორმაციით, ახალგამოვლენილი გარემოებათა გამო განაჩენის გადასინჯვის მოთხოვნით თბილისის სააპელაციო სასამართლოს უკვე მიმართეს, ხოლო მტკიცებულებების გაყალბებასა და მოწმეებზე ზეწოლის განხორციელებაში მხილებული სამართალდამცავების მიმართ გადაწყვეტილება გამოძიების დასრულების შემდეგ მიიღება.

პროკურატურაში შექმნილი ახალი დეპარტამენტის საქმიანობა უკანონოდ გასამართლებული პირების განაჩენების გადასინჯვასა და მათი დარღვეული უფლებების აღდგენას უკავშირდება. უწყების თქმით, პროცესს შეუქცევადი ხასიათი ექნება, რასთან დაკავშირებითაც მიმდინარეობს გამოძიებები მსჯავრდებულ პირთა უფლებების არსებითად დარღვევის ფაქტებზე.