დონალდ ტუსკს ოთხშაბათს პოლონეთის პარლამენტში ნდობა გამოუცხადეს, რის შემდეგაც მან პოლონეთის პრემიერმინისტრის თანამდებობა შეინარჩუნა. ინფორმაციას გამოცემა Politico ავრცელებს.

ტუსკის კანდიდატურას 248 დეპუტატმა მისცა ხმა, 210 კი წინააღმდეგ წავიდა. აღსანიშნავია, რომ პარლამენტში ტუსკის კოალიცია უმრავლესობით არის წარმოდგენილი.

"ნება მომეცით პირდაპირ საქმეზე გადავიდე — მე ვთხოვ პარლამენტს, მხარი დაუჭიროს მთავრობას ნდობის ვოტით, რადგან ჩვენ არ შეგვიძლია უგულებელვყოთ ის რთული რეალობა, რომელშიც ვართ. ჩვენ გვჭირდება სიცხადე საპრეზიდენტო არჩევნების შემდეგ ჩვენს ამჟამინდელ პოზიციასთან დაკავშირებით" — განაცხადა ტუსკმა საპრეზიდენტო არჩევნებში კაროლ ნავროცკის გამარჯვების შემდეგ.

როგორც Politico წერს, ტუსკი იმედოვნებდა, რომ საპრეზიდენტო არჩევნებში მისი პარტიის წარმომადგენლის რაფალ ტრჟასკოვსკის გამარჯვება დააჩქარებდა შიდა ცვლილებებს და გააძლიერებდა მის საგარეო პოლიტიკურ კრედიტუნარიანობას.

გამოცემა აღნიშნავს, რომ მის მთავრობას ახლა მოუწევს ბრძოლა მტრულად განწყობილი ნავროცკის წინააღმდეგ, რომელსაც როგორც პრეზიდენტს შეუძლია ვეტო დაადოს კანონმდებლობას, რომლის გადასალახადაც ტუსკის კოალიციას არ აქვს პარლამენტში საკმარისი ხმები.

"გამოწვევები მოსალოდნელზე დიდია. ჩვენ წინაშე დგას ორწელიწად-ნახევარი უკიდურესად მძიმე სამუშაო პოლიტიკურ პირობებში, რომლებიც არ გაუმჯობესდება, პრეზიდენტით, რომელიც საუკეთესო შემთხვევაში, არ იქნება თანაგრძნობით განწყობილი ცვლილებების მიმართ — ისევე, როგორც მიმავალი პრეზიდენტი", — განუცხადა ტუსკმა პარლამენტს.

ნავროცკი ფიცს 6 აგვისტოს დადებს და პრეზიდენტის პოსტზე ანჯეი დუდას შეცვლის, რომელიც პრეზიდენტი ორი ხუთწლიანი ვადით იყო.

ცნობისთვის, 1 ივნისს ტუსკის კოალიცია საპრეზიდენტო არჩევნებში დამარცხდა. პრეზიდენტი ნაციონალისტი კაროლ ნავროცკი გახდა.