ზუგდიდის გამგებლის მოადგილე, მამუკა წოწერია ამბობს, რომ ზუგდიდის რაიონში აზიური ფაროსანასგან განადგურებული თხილისთვის მოსახლეობას კომპესაცია არ დაურიგდება. ამის შესახებ გამგებლის მოადგილემ რადიო ათინათს მოსახლეობასთან შეხვედრის შემდეგ ესაუბრა.

"საკითხი დგას იმ სახელმწიფო პროგრამების გაძლიერებაზე, რომელიც გარკვეულწილად შეუმსუბუქებს ჩვენს მოსახლეობას მდგომარეობას", - აღნიშნა რადიო ათინათთან მამუკა წოწერიამ.

გამოცემა იმ მოქალაქეების კომენტარებსაც ავრცელებს, რომლებიც გამგებლის მოადგილესთან შეხვედრაზე იყვნენ.

"მადლობა მინდა, რომ გადავუხადო, არ მოგვატყუა არჩევნებისთვის და გვითხრა ალალად რა შეუძლია მთავრობას", - განუცხადა რადიო ათინათს ერთ-ერთმა მოქალაქემ.

სოფლის მეურნეობის მინისტრის მოადგილემ, გელა ხანიშვილმა On.ge-სთან საუბრისას აღნიშნა, რომ დაზიანებული თხილი საერთო მოსავლის 10-12 პროცენტია. მისი თქმით, თხილის გარკვეული ტექნოლოგიებით გადამუშავების შემთხვევაში ორ პროცენტს არ აღემატება.