აქტივისტ და ჟურნალისტ ნანუკა ჟორჟოლიანის შვილის, მარიამ გეგუჩაძის სახლში პროკურატურა ჩხრეკას ატარებს. როგორც გეგუჩაძე ტვ პირველთან ამბობს, ადგილზე არც ის იმყოფება, არც ადვოკატი.

"ერთ წინადადებად გეტყვით — ჩემს სახლში მიმდინარეობს ჩხრეკა ისე, რომ არც მე ვარ, არც ადვოკატია, მარტო ესენი არიან [მიუთითებს პოლიციელებზე]. მეუბნებიან — რომ მორჩება, მერე შევალ. ვითხოვ, რომ შევიდე ჩემს სახლში. სახლი არის ჩემს სახელზე, ოღონდ მე არ ვცხოვრობ, ცხოვრობს ბიძაჩემი.

როგორც ჩანს იმიტომ, რომ "სირცხვილიაზე" არის ცალკე აღძრული საქმე, შევიდნენ ჩემს სახლში. იმ "სირცხვილიაზე", რომელიც არ ფუნქციონირებს, დააყადაღეს ანგარიში, რომელიც არ არსებობდა, სადაც არც მე მიშვებენ, არც ადვოკატს. პარალელურად მიმდინარეობს ჩხრეკა დედაჩემის [ნანუკა ჟორჟოლიანის] სახლში, სადაც იმყოფებიან დედაჩემი, ჩემი ძმა და ბაბუაჩემი ადვოკატი", — ამბობს მარიამ გეგუჩაძე ტვ პირველთან.

ამას გარდა, დღეს დილიდან პროკურატურა ნანუკა ჟორჟოლიანის, ფონდ სირცხვილიას დამფუძნებლის, მარიამ ბაჯელიძის და ადამიანის უფლებათა ცენტრის ხელმძღვანელის, ალეკო ცქიტიშვილის სახლებში შევიდა ჩხრეკის ჩასატარებლად. სამართალდამცავებმა უკვე დატოვეს მარიამ ბაჯელიძის სახლი. ჩხრეკები გრძელდება ნანუკა ჟორჟოლიანისა და ალეკო ცქიტიშვილის სახლებში.