მარსელში, რუსეთის გენერალური საკონსულოს შენობასთან აფეთქება მოხდა. წინასწარი ინფორმაციით, მსხვერპლი არ არის. ამის შესახებ ფრანგული ტელეარხი BFMTV იტყობინება.

ვრცელდება ინფორმაცია, რომ მარსელის მე-8 ოლქში რუსეთის საკონსულოს ბაღში ორი ბოთლი მოლოტოვის კოქტეილით ისროლეს. ორივე ჭურვი დიპლომატიური შენობის ბაღში მოხვდა, თუმცა ნგრევისა და მსხვერპლის შესახებ ინფორმაცია არ ვრცელდება. შემთხვევის ადგილზე ოცდაათამდე მეხანძრე და პოლიციის თანამშრომელი იყო მობილიზებული.

რუსეთის საგარეო საქმეთა სამინისტროს სპიკერმა მარია ზახაროვამ განაცხადა, რომ ინციდენტი "ტერორისტული თავდასხმის ნიშნებს" შეიცავს. რუსეთი მოითხოვს, რომ ფრანგულმა მხარემ მიიღოს ყოვლისმომცველი ზომები გამოძიებისთვის, განაცხადა ზახაროვამ.

"მარსელში რუსეთის გენერალური საკონსულოს ტერიტორიაზე მომხდარ აფეთქებას ტერორისტული თავდასხმის ყველა ნიშანი აქვს. ჩვენ მოვითხოვთ, რომ მათ მიიღონ ყოვლისმომცველი და სწრაფი ზომები გამოძიებისთვის, ისევე როგორც ნაბიჯები საზღვარგარეთ რუსეთის მისიების უსაფრთხოების გასაძლიერებლად", — განაცხადა ზახაროვამ.

რუსეთის გენერალური საკონსულო ამბრუაზ-პარეს გამზირზე, მე-8 ოლქში მდებარეობს. ამ რაიონში მრავალი საკონსულოა, მათ შორის ეგვიპტის, ტუნისის, სომხეთისა და სან-ტომე და პრინსიპის.