პარტია "გახარია საქართველოსთვის" ლიდერი გიორგი გახარია ლატვიის საგარეო საქმეთა მინისტრს, ბაიბა ბრაჟეს შეხვდა.

გიორგი გახარია სოციალურ ქსელში წერს, რომ ბაიბა ბრაჟესთან შეხვედრაზე საუბარი იყო საქართველოში არსებულ პოლიტიკურ კრიზისსა და უსაფრთხოების გამოწვევებზე.

"ლატვიის საგარეო საქმეთა მინისტრთან, ბაიბა ბრაჟესთან შეხვედრაზე საუბარი იყო საქართველოში არსებულ პოლიტიკურ კრიზისსა და უსაფრთხოების გამოწვევებზე.

ხაზი გავუსვი პოლიტპატიმრების დაუყოვნებლივი გათავისუფლების აუცილებლობას, ახალი არჩევნების თავისუფალ და სამართლიან გარემოში ჩატარების აუცილებლობასა და საერთაშორისო უსაფრთხოების რისკებს — როგორ იყენებს რუსეთი საქართველოს კრიზისს საკუთარი გავლენების გასაფართოებლად", — აცხადებს გიორგი გახარია.

როგორც გიორგი გახარიამ ტვ პირველთან საუბრისას განაცხადა, რომ "კატასტროფაა და წარმოუდგენელია, რომ საქართველოდან დღეს ოფიციალური ხელისუფლების წარმომადგენლები მიუნხენის უსაფრთხოების კონფერენციაზე არ არიან".

"პირველ რიგში მიხარია, რომ აქ იქნება სალომე ზურაბიშვილი და, მე დარწმუნებული ვარ, რომ ჩვენ ერთად შევძლებთ დღეს გლობალურ ლიდერებს, რომლებიც მონაწილეობენ გლობალური ცვლილების წესრიგში, ავუხსნათ, რომ საქართველო არის ის ქვეყანა, რომელიც ყოველთვის იმსახურებდა და დღეს განსაკუთრებით იმსახურებს მხარდაჭერას იყოს დემოკრატიული, ცივილიზებული სამყაროს ნაწილი.

დღეს მიუნხენში ახალი გლობალური წესრიგის კონტურები იხატება, კატასტროფაა და წარმოუდგენელია, რომ საქართველოდან დღეს ოფიციალური ხელისუფლების წარმომადგენლები მიუნხენის უსაფრთხოების კონფერენციაზე არ არიან. თქვენ გგონიათ მათ არ შეეძლოთ აქ ჩამოსვლა? შეეძლოთ, მაგრამ კიდევ უფრო დიდ სირცხვილს დაეჯახებოდნენ, იმიტომ, რომ მათთან არავინ შეხვედრას არ მოისურვებდა და ვერავის დაელაპარაკებოდნენ. ამიტომ არ არიან დღეს აქ წარმოდგენილები. მათ საკუთარი ეგო დააყენეს ყველაზე მაღლა იმის მაგივრად, რომ საქართველო დღეს აქ იყოს წარმოდგენილი, როგორც იმ გლობალური წესრიგის კრიტიკულად მნიშვნელოვანი ნაწილი, რომელზეც ხვალ და ზეგ იქნება აქ საუბარი", — განაცხადა გიორგი გახარიამ მიუნხენიდან "ტვ პირველის" ეთერში.