ზუგდიდში პროევროპული საპროტესტო აქციების მონაწილე, სამოქალაქო აქტივისტი შალვა ესართია დააკავეს. ინფორმაციას რადიო თავისუფლება ავრცელებს.

როგორც აქციების მონაწილემ, პარტია "დროას" წარმომადგენელმა მარიამ სიჭინავამ უთხრა რადიო თავისუფლებას, შალვა ესართია სამართალდამცავებმა პოლიციის სამმართველოში ადმინისტრაციული სამართალდარღვევის ოქმის ჩასაბარებლად დაიბარეს და ადგილზე მისული პოლიციისადმი დაუმორჩილებლობის მუხლით დააკავეს.

სიჭინავას ინფორმაციით, დაკავებულთან არ შეუშვეს ადვოკატი და სახალხო დამცველის აპარატის წარმომადგენელი, ამიტომ არ გამორიცხავენ, რომ აქტივისტი შესაძლოა ნაცემი იყოს.

შალვა ესართია ფოთის წინასწარი დაკავების იზოლატორში გადაიყვანეს.

"მას უნდა ჩაბარებოდა ოქმი აქციაზე ნიღბის ტარებისთვის, რაც ეხება 174-ე მუხლს და შემდეგ დააკავეს 173-ე მუხლით. სამმართველოში რა მოხდა, არ ვიცი…. მასთან არ ყოფილა ადვოკატი და სახალხო დამცველის წარმომადგენელი. ადამიანი ქურდულად გააპარეს…. ადვოკატი არ შეუშვეს …. არაფერს გამოვრიცხავთ, შესაძლოა არის ნაცემი", — თქვა მარიამ სიჭინავამ.

სამოქალაქო აქტივისტის დაკავებაზე ჯერჯერობით კომენტარს არ აკეთებენ შინაგან საქმეთა სამინისტროში.

სახალხო დამცველის აპარატში არ ადასტურებენ ინფორმაციას, რომ მათი წარმომადგენელი დაკავებულთან არ შეუშვეს. როგორც რადიო თავისუფლებას სახალხო დამცველის აპარატის საზოგადოებასთან ურთიერთობის დეპარტამენტის ხელმძღვანელმა ანი თამაზაშვილმა უთხრა, შალვა ესართია უკვე გადაყვანილი იყო იზოლატორში, როცა სამმართველოში მათი წარმომადგენელი მივიდა.

შალვა ესართია ზუგდიდში, სახელმწიფო რწმუნებულის ადმინისტრაციასთან მიმდინარე პროევროპული საპროტესტო აქციების მონაწილეა.

გუშინ, 29 იანვარს, მან პერფორმანსი მოაწყო და პარტია ქართული ოცნების დამფუძნებლისა და საპატიო თავმჯდომარის, ბიძინა ივანიშვილის ფიტული "ჯოჯოხეთის ცეცხლში" დაწვა.

"ყველას, ვინც კი სამშობლოს უღალატებს, ასე, ჯოჯოხეთის ქვაბში მოვხარშავთ", — ასე ახსნა პერფორმანსი სამოქალაქო აქტივისტმა შალვა ესართიამ.