"უკვე შემოვიღეთ ვიზალიბერალიზაციის შეზღუდვა დიპლომატიური პასპორტებისთვის, შევუჩერეთ ფინანსური დახმარება მთავრობას და ვაძლევთ ამ თანხებს NGO-ებს და სამოქალაქო საზოგადოებას", — ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა ბრიუსელში ევროკავშირის საგარეო საქმეთა მინისტრების შეხვედრის დაწყებამდე ჟურნალისტებთან განაცხადა. მისი თქმით, ახლა ყველაფერი დამოკიდებულია ქართველ ხალხზე.

"ჩვენ დღეს განვიხილავთ საქართველოს საკითხს. ჩვენ უკვე შემოვიღეთ ვიზალიბერალიზაციის შეზღუდვა დიპლომატიური პასპორტებისთვის. ჩვენ ასევე შევუჩერეთ ფინანსური დახმარება მთავრობას და ვაძლევთ ამ თანხებს არასამთავრობო ორგანიზაციებსა და სამოქალაქო საზოგადოებას. თუმცა, ახლა ყველაფერი დამოკიდებულია ქართველ ხალხზე", – განაცხადს კაია კალასმა.

შეგახსენებთ, რომ ევროკავშირის საგარეო საქმეთა მინისტრები დღეს ბრიუსელში იკრიბებიან, სადაც სხვა საკითხებთან ერთად საქართველოზეც იმსჯელებენ. ევროკავშირის წევრი ქვეყნების ელჩებმა ქართული დიპლომატიური და სამსახურებრივი პასპორტებისთვის უვიზო რეჟიმის შეჩერებას მხარი 24 იანვარს დაუჭირეს და შეზღუდვა ოფიციალურად ბრიუსელში, სავარაუდოდ, დღეს გაფორმდება. წინადადებაზე ევროკომისიამ იმუშავა, სამუშო დოკუმენტი 23 იანვრითაა დათარიღებული.

სხდომას ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი უხელმძღვანელებს. შეხვედრა თბილისის დროით 13:00 საათზე დაიწყება.