ყოფილი სახალხო დამცველი და სადამკვირვებლო მისია "ჩემი ხმა" წარმომადგენელი, ნინო ლომჯარია, ამ მომენტში, საპარლამენტო არჩევნების შესაძლო გაყალბების ფაქტებზე დაწყებული საქმის გამოძიების ფარგლებში, თბილისის საქალაქო სასამართლოში მაგისტრატი მოსამართლის წინაშე იკითხება.

გამოკითხვის დაწყებამდე ლომჯარიამ განაცხადა, რომ სასამართლოში მისულია კონკრეტული მტკიცებულებებით.

"პროკურატურამ ცესკო-ს მიმართვის საფუძველზე გამოძიება დაიწყო. მიუხედავად იმისა, რომ წინასაარჩევნო პერიოდში, ასევე, არჩევნების დღეს და შემდეგ პერიოდშიც, ჩვენი მხრიდან არაერთი ინფორმაცია ვრცელდებოდა დანაშაულის შემცველი ფაქტების შესახებ, პროკურატურას ამ ფაქტებზე გამოძიება არ დაუწყია. გამოძიება ცესკო-ს მიმართვის საფუძველზე დაიწყეს. მე დღეს გამოკითხვაზე ვარ დაბარებული, რა თქმა უნდა, ველოდი ამას და სურვილი მქონდა ამ გამოკითხვაში მონაწილეობის მიღების, რადგან აქ ბევრი მტკიცებულებით ვართ მოსული და ვაპირებთ, სათითაოდ ვისაუბრო ყველა იმ ინფორმაციაზე, რაც ჩვენს განცხადებებს, შეფასებებს ადასტურებს. საქმე ეხება არამხოლოდ იმ მუხლის გარშემო არსებულ მტკიცებულებებს, რომლის გარშემოც დაწყებულია გამოძიება, არამედ, კიდევ სხვა, არაერთი სისხლის სამართლის ნორმის დარღვევის შესახებ ინფორმაციას, მათ შორის, ამომრჩევლის ნებაზე ზეგავლენას, ამომრჩევლის პერსონალური მონაცემების უკანონოდ მოპოვება-დამუშავებას, ამომრჩევლის არჩევანის ფარულობის დარღვევას, ამომრჩევლის მოსყიდვას და ა.შ. ასევე გვაქვს კონკრეტული ინფორმაცია, რომელიც შეიცავს ცესკო-ს წევრების და საარჩევნო ადმინისტრაციების მხრიდან უფლებამოსილების გადამეტების თუ ბოროტად გამოყენების ინფორმაციას. ბევრი მტკიცებულება გვაქვს იმისთვის, რომ პროკურატურას დავეხმაროთ ეს საქმე გამოიძიონ, პროკურატურის ადგილას რომ ვიყო, ძალიან მადლიერი ვიქნებოდი სადამკვირვებლო ორგანიზაციების მიმართ, რადგან მათ ამ საქმის გამოძიებას ძალიან გავუადვილებთ, იმდენად ბევრი მტკიცებულება გვაქვს. იქიდან გამომდინარე, რომ ავტორიტარიზმში ვცხოვრობთ, სადაც დამოუკიდებელი სახელმწიფო ინსტიტუტები არ არსებობენ, მაგალითად, გუშინ ცესკო-მ პარლამენტის ფუნქცია შეითავსა, კანონის საწინააღმდეგოდ თავად დაადგინა პრეზიდენტის არჩევის ვადები, რაც კანონსაწინააღმდეგოა, ეს კონსტიტუციური და კანონისმიერი ჩარჩოებიდან გასვლაა, ამიტომ ასეთ დროს, როცა სრული თვითნებობაა, რა თქმა უნდა, განსაკუთრებული, პოზიტიური მოლოდინები არ გვაქვს", — განაცხადა ლომჯარიამ.

მან ასევე აღნიშნა, რომ დაიწყეს მომზადება, რათა ევროკავშირის "ტექნიკურ მისიას" კონკრეტული მტკიცებულებები გადასცენ.

"ვემზადებით ევროკავშირის "ტექნიკურ მისიასთან" შესახვედრად. იმედი გვაქვს, ისინი ობიექტურ შეფასებას დადებენ, რადგან მათაც მივაწვდით ყველა ამ ინფორმაციას და მტკიცებულებებს", — განაცხადა ლომჯარიამ.

შეგახსენებთ, რომ ლომჯარიამ თავდაპირველად პროკურატურაში გამოკითხვაზე უარი განაცხადა და მაგისტრატ მოსამართლესთან გამოკითხვაზე მისვლა მოითხოვა.