ომბუდსმენმა ოჯახში ძალადობაზე, პოლიციელის არაეფექტური რეაგირების გამო, შინაგან საქმეთა სამინისტროს რეკომენდაციით მიმართა. სახალხო დამცველის აპარატის მიერ დღეს, 23 აგვისტოს გავრცელებულ განცხადებაში ვკითხულობთ, რომ რეკომენდაციები ორ საქმეს შეეხება.

რეკომენდაციით, საქართველოს სახალხო დამცველმა მოითხოვა საქმეების საფუძვლიანად შესწავლა და ქმედითი ღონისძიებების გატარება ოჯახის წევრთა დასაცავად. სახალხო დამცველმა შსს-ს სთხოვა დროულად და სრულყოფილად მიეწოდოს ქალთა მიმართ და ოჯახში ძალადობის საქმეებზე გამოთხოვილ ინფორმაციებზე პასუხი.

"ხშირად არასრულად და დაგვიანებით მოწოდებული ინფორმაცია ხელისშემშლელია ძალადობის შემთხვევებზე ეფექტური რეაგირების განსახორციელებლად", - განმარტავენ ომბუდსმენის აპარატში.

აპარატში განმარტავენ, რომ ერთ-ერთი განმცხადებლის თქმით, ოჯახის წევრები მასზე ფიზიკურ, ფსიქოლოგიურ, ეკონომიკურ ძალადობასა და სიცოცხლის ხელყოფის მუქარას ახდენდნენ.

"საქმის შესწავლისას გამოვლინდა, რომ საქართველოს შინაგან საქმეთა სამინისტრომ ძალადობის ფაქტები მხოლოდ ზედაპირულად შეისწავლა; ასევე, სრულიად უგულებელყო სასამართლოს მიღებული გადაწყვეტილებები შემაკავებელი და დამცავი ორდერების თაობაზე და არ ახორციელებდა მათ შემდგომ მონიტორინგს. მონიტორინგის განუხორციელებლობის გამო, შემაკავებელი და დამცავი ორდერის გამოწერამ აზრი დაკარგა და ძალადობა არ იქნა აღმოფხვრილი", - აღნიშნავენ სახალხო დამცველის აპარატში.

უწყებაში აღნიშნავენ, რომ მეორე საქმე ოჯახში სისტემურ ძალადობას შეეხებოდა, პოლიციის თანამშრომლებს კი გაუჭირდათ ეკონომიკური ძალადობის და მუქარის იდენტიფიცირება.

"საქმის შესწავლის შედეგად დადგინდა, რომ პოლიციის მიერ დაცვის მხოლოდ ადმინისტრაციული მექანიზმები იქნა გამოყენებული, რაც ოჯახის წევრთა უსაფრთხოების დაცვას ვერ უზრუნველყოფდა მექანიზმების არათანმიმდევრული ხასიათის გამო", - დასძენენ სახალხო დამცველის აპარატში.