იურისტმა ეკა ბესელიამ, დღეს, ტვ პირველის ეთერში განაცხადა, რომ სასამართლო არის კლანური მმართველობისა და კონტროლის ქვეშ.

მისი თქმით, მოსამართლე ვლადიმერ ხუჭუას მსგავს "გაბედულ და მართალ" მოსამართლეებს, არ მისცეს საშუალება, რომ ბევრი სარჩელი განეხილათ. მისი თქმით, "მთლიანად ამ პროცესს დიმიტრი გვრიტიშვილი აკონტროლებდა".

"სასამართლო არის კლანური მმართველობის ქვეშ და კონტროლის ქვეშ, მათ არც კი დაუშვეს, რომ რომელიმე მოსამართლე, მოსამართლე ხუჭუას მსგავსად, შეიძლება აღმოჩენილიყო ბევრი სარჩელის განმხილველ მოსამართლეთაგან, ვინც შეიძლებოდა ყოფილიყო ასეთივე გაბედული და მართალი, წესიერი და პატიოსანი, არ დაუშვეს ეს და ამიტომ ერთი კონტროლის ქვეშ მოაქციეს, (დიმიტრი) გვრიტიშვილი აკონტროლებდა მთლიანად ამ პროცესს", — თქვა ბესელიამ.

მანვე აღნიშნა, რომ სასამართლოს ყველა სარჩელი ერთიანად არ უნდა განეხილა, რადგან შეიძლება დარღვევები არ ყოფილიყო ერთგვაროვანი.

"ყველა სარჩელი გააერთიანეს და ამ დროს ზუსტად მთავარი პრინციპი საქმის სამართლიანი განხილვის არის ის, რომ ინდივიდუალურმა მოსამართლეებმა, ინდივიდუალური თავისუფლების პირობებში, რომელიც მათ კონსტიტუციით აქვთ, გადაწყვიტონ ყველა კონკრეტული საქმე. იმიტომ, რომ შეიძლება დარღვევები ჰგავს ერთმანეთს, მაგალითად ფარულობა ყველგან ირღვეოდა, მაგრამ კარუსელები, გაყალბებული ბიულეტენები, ზედამხედველები, რეგისტრატორები, საარჩევნო ე.წ. კაბინასთან მდგომი ადამიანების ჩარევები, შეიძლება არ ყოფილიყო ერთგვაროვანი, მათ შორის მოსული ადამიანების გადაწყვეტილებაში ჩარევები, შეიძლება არ ყოფილიყო ერთგვაროვანი. მათ შორის მოსული ადამიანების და ხმის მიცემული ბიულეტენების რაოდენობის განსხვავებულობა. ანუ დარღვევებია განსხვავებული უბნების მიხედვით, თუმცა დარღვევა იყო ყველგან. ამიტომაც, არ შეიძლება გააერთიანო ეს საჩივრები, რაღაც კოლექტიური პრინციპით განიხილო ასეთი დავები", — ამბობს ბესელია.