უნგრეთის დედაქალაქში დღეს ევროპის პოლიტიკურ გაერთიანების სამიტი გაიხსნება. საქართველოს სამიტზე პრემიერმინისტრი ირაკლი კობახიძე წარადგენს — ის დელეგაციის წევრებთან ერთად უკვე ბუდაპეშტშია.

დაგეგმილია პრემიერ-მინისტრ ირაკლი კობახიძის სიტყვით გამოსვლა პანელურ დისკუსიაზე, რომლის მთავარი თემაა ეკონომიკური უსაფრთხოება და დაკავშირებადობა. მიგრაცია და ეკონომიკური უსაფრთხოება, გლობალური ვაჭრობა, ტრანსპორტი, დაკავშირებადობა, ენერგეტიკა, საინფორმაციო ტექნოლოგიები — ეს იმ თემების ჩამონათვალია, რომელთაც სამიტი შეეხება.

საქართველოს დელეგაციის შემადგენლობაში არიან საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი ლევან ჟორჟოლიანი.

ევროპული საბჭოს პრეზიდენტი, შარლ მიშელი ევროკავშირის წევრი სახელმწიფოების ლიდერებისთვის გაგზავნილ მისაწვევში წერს, რომ ევროპული საბჭოს არაფორმალურ შეხვედრაზე ევროპელი ლიდერები არჩევნების შემდეგ საქართველოში არსებულ ვითარებასაც განიხილავენ.