ისრაელის საგარეო საქმეთა მინისტრმა, ისრაელ კაცმა, გაეროს გენერალური მდივანი, ანტონიო გუტერეში, პერსონა ნონ გრატად გამოაცხადა და ისრაელში შესვლა აუკრძალა.

მინისტრმა გუტერეში მიკერძოებულობაში დაადანაშაულა და ამის მაგალითად ახსენა, რომ ამ უკანასკნელმა არც კი დაგმო ირანის თავდასხმა ისრაელზე.

"ნებისმიერი ადამიანი, ვინც არ დაგმობს ირანის საზარელ თავდასხმას ისრაელზე, არ იმსახურებს, რომ ისრაელის მიწაზე ფეხი დადგას. ეს ისრაელის მოძულე გენერალური მდივანია, რომელიც ტერორისტებს ეხმარება", — განაცხადა ისრაელ კაცმა

გადაწყვეტილება კიდევ უფრო აღრმავებს გაეროსა და ისრაელს შორის არსებულ დაძაბულობას.

2 ოქტომბერს ირანის რელიგიურმა ლიდერმა, აიათოლა ალი ხამენეიმ ახლო აღმოსავლეთში სამხედრო ძალით ყოფნის გამო დასავლეთი გააკრიტიკა და უწოდა მას კონფლიქტების, ომების, წინააღმდეგობებისა და მტრობის წყარო.